Inundasaun iha sidade Dili haree hosi leten a’as. Imajen/Machel Silveira

DILI, 04 abríl 2021 (TATOLI)—Primeiru-Ministru (PM), Taur Matan Ruak, sei konvoka ho urjénsia reuniaun Komisaun Interministeriál ba protesaun sivíl no kalamidade (dezastre naturál) ne’ebé sei hala’o iha aban dadeer, 05 abríl.

“Primeiru-Ministru lidera no koordena hela Governu tomak atu haree no responde ba situasaun ida-ne’e tuir kbiit ne’ebé Governu iha, no iha tempu badak sei ko’alia ba povu tomak,” Vise Primeiru-Ministru no Ministru Planu no Ordenamentu, José Reis, dehan liuhusi pájina ofisiál ne’ebé TATOLI asesu, domingu ne’e.

Vise PM hateten VIII Governu hahú hala’o mekanizmu sira atubele responde ho lais ba nesesidade sira ne’ebé mosu daudaun, liuliu ba populasaun afetadu liu.

“Governu ativa ona mekanizmu balun ba evakuasaun no atu presta asisténsia ba populasaun afetadu sira, inklui ai-han,” José Reis tenik.

Ba kestaun kalamidade ne’e, tuir Vise PM, Governu tenke investe liután iha Planu no Ordenamentu, atubele sai matadalan ba konstrusaun infraestrutura ne’ebé adekuadu no reziliente.

“Ha’u rasik konsege ba haree fatin balun no haree ho matan dezastre boot ne’ebé akontese. Autoridade kompetente sira prepara hela relatóriu ho dadus ofisiál sira atu fó-sai iha tempu badak nia laran,” nia informa.

Iha biban ne’e, José Reis hato’o solidariedade no sentida kondolénsia ba família enlutada sira.

Nia mós apresia komunidade hatudu solidariedade ba malu, no apela atu hotu-hotu bele kontinua fó liman ba malu atubele tulun ema hotu iha momentu susar ida-ne’e.

“Agora tempu atu ita hotu hatudu espíritu solidariedade ne’ebé parte hosi ita-nia identidade no ita-nia luta,” nia esklarese.

Inundansaun ida-ne’e lori populasaun nia uma, hamate ema no afeta mós parte barak iha sidade laran. Estrada balun monu no ai balun tohar hodi difikulta asesu lais ba fatin objetivu.

Jornalista: Nelson Sousa

Editór: Xisto Freitas

HAKEREK NO HATÁN

Please enter your comment!
Please enter your name here