Polísia Nasionál Timor-Leste hosi BOP haruka fila abitante sira ne'ebé hakarak sai hosi Dili ba munisípiu sira parte loromonu nian iha pontu entrada Tasi-Tolu, sesta (02/04/2021). Imajen Tatoli/Antonio Gonçalves

DILI, 03 abríl 2021 (TATOLI)-Front Mahasiswa Timor-Leste (FMTL) sauda n louva esforsu sira VIII Governu Konstitusionál ba prevensaun surtu COVID-19 iha Timor-Leste.

Liuhosi konferénsia imprensa, sábadu ne’e, iha salaun FONGTIL Caicoli, Dili, FMTL aprezenta mós sira-nia  apresiasaun ba esforsu hotu ba medida serka sanitária no konfinamentu domisiliáriu iha munisípiu Dili, Baucau no Viqueque, ne’ebé nu’udar meiu jerál atu hakotu korrente propagasaun peste letál COVID-19 ne’e.

Notísia Relevante : La aguenta ona ho SS iha Dili, abitante sira reklama fila ba munisípiu

Portavós FMTL, Isaias Soares, husu mós ba Governu liuliu parte kompetente sira atu kria sentru teste swab ba iha pontu entrada sira iha kapitál Dili, nune’e bele halo teste swab ba abitante sira ne’ebé hakarak fila ba sira-nia munisípiu.

Relasiona ho situasaun atuál ne’ebé akontese iha loron 02 abríl 2021, ne’ebé komunidade hotu-hotu hodi husu exodus ba sira ida-idak nia munisípiu ho razaun tanba hamlaha, FMTL sujere ba Governu liuliu parte kompetente sira atu kria sentru tolu ka hat iha pontu entrada sira iha Dili atu fasilita teste swab ba estudante, Universitáriu no komunidade hirak ne’ebé orijen hosi munisípiu  hakarak fila ba sira-nia munisípiu.

Isaias Soares afirma ema hotu rekoñese katak desizaun ida-ne’e difisil duni tanba iha parte ida hakarak hapara propagasaun surtu ida ne’e, maibé parte seluk mós ezije atu buka solusaun loloos tanba povu hahú hamlaha.

“Ami husu autoridade sira bele uza nafatin kanál ne’ebé durante ne’e ita iha tiha ona, ne’ebé hotu-hotu tenke hetan permisaun hosi Sentru Integradu Jestaun Krize-Sala Situasaun (CIGC-SS) atu fasilita abitante sira ne’ebé hakarak sai hosi Dili,”  Isaias Soares tenik.

FMTL mós husu ba autoridade sira atu atua situasaun tomak ho kalma, másimu atensaun maibé ho rápida atu prevene situasaun sira-ne’e hotu, nune’e ema hotu labele monu tama iha sirkunstánsia ne’ebé ultrapasa kapasidade kontrolu nian.

“Ami mós enkoraja atu Governu no Deputadu sira halo servisu aliña ho estatuta emerjénsia ita-nia Estadu nian. Labele Estadu mak emerjénsia, maibé atuasaun la emerjénsia enterru apoiu nesesidade ba sidadaun sira ne’ebé presiza liu no vulneravel liu,” Isaias Soares subliña.

FMTL rekomendasaun ba Governu katak, maske iha risku maibé kompara ho la permite abitante sira sai hosi Dili ninian mak, risku boot demais, tanba bele provoka frustrasaun, konflitu, no hamlaha, situasaun bele muda aan ba iha dezobediénsia sosiál.

“Ami mós apresia autoridade seguransa ne’ebé esforsu maka’as loos hodi impoin regra orden protokolu tuir Organizasaun Mundiál Saúde (OMS) nian hodi evita moras aat da’et no buras iha ita-rain doben Timor-Leste. Tanba ita konsiente katak globalmente preokupa no konsidera COVID-19 nu’udár inimigu invizivel  ne’ebé hamate ona ema tokon ba tokon iha nasaun hotu iha mundu, ne’ebé daudaun ne’e tama ona iha Timor-Leste,” nia hateten.

Jornalista : Arminda Fonseca

Editór       : Francisco Simões

HAKEREK NO HATÁN

Please enter your comment!
Please enter your name here