Estudante Abeba da Costa Neha, taka kapasete pink simu foos hosi MSSI iha UNTL. Imajen Tatoli/Domingos Piedade

DILI, 03 abríl 2021 (TATOLI) – Estudante Universidade Nasionál Timor Lorosa’e (UNTL), Fakuldade Edukasaun, Departamentu Dalen Tetum, Abeba da Costa Neha,  hato’o agradesimentu ba Governu ne’ebé mak fó ona apoiu foos ba estudante sira hela iha kost iha ámbitu serka sanitária no konfinamentu domisiliáriu iha kapitál Díli.

Notísia Relevante : MSSI distribui foos saka 5094 ba UNTL

“H’au kontente tebetebes ho foos saku ida hosi Governu, mezmu la barak mós kontinua nafatin agradese ba Estadu fó ai-han ba ami iha tempu serka sanitaria no konfinamentu domisiliáriu,” Abeba da Costa Neha hateten ba Agência Tatoli, bainhira simu hela foos apoia MSSI nian ne’e iha UNTL, Dili, sábadu ne’e.

Nia dehan ho foos saku ida ne’e bele aguenta too fulan-ida tanba, nu’udar estudante UNTL hela iha kost, la hela ho família no hela ketak hosi família bele poupa.

Abeba haktuir esperiénsia katak durante tempu serka sanitaria iha kapitál Díli sente triste uitoan, ho razaun katak hahán komesa menus ona no família sira labele haruka osan hosi munisípiu mai Díli. Maibé agora simu ona foos hosi Governu bele halo kaman ona nesesidade bázika nian.

Nia hato’o agradese mós ba kost nain sira, liuliu sira-nia komprensaun iha situasaun serka sanitaria no konfinamentu domisiliáriu tanba balun hamenus folin kost no balun fali sujere depois mak selu de’it.

Lorena Soares Maria Gaspar, nu’udar mós estudante hakarak agradese ba Governu tanba bele fó ona apoia ai-han ruma ba estudante sira UNTL nian ne’ebé hwl iha kost.

“Hau hakarak agradese tebes ba dirijente sira iha UNTL ne’ebé mak serbisu hamutuk ho Governu atu bele distribui ai-han ruma ba ami estudante sira hodi aguenta moris,” nia tenik.

Estudante Abeba da Costa Neha no Lorena Soares Maria Gaspar hosi Aldeia Moro, Suku Parlamento, Postu Administrativu  Lospalos, Munisípiu Lautem.

Jornalista : Domingos Piedade Freitas

Editor      : Francisco Simões

HAKEREK NO HATÁN

Please enter your comment!
Please enter your name here