Ministru Ensinu Superior Siénsia no Kultura, Longuinhos dos Santos. Imajen TATOLI/Egas Cristóvão.

DILI, 03 abríl 2021 (TATOLI) – Ministru Ensinu Superior Siénsia no Kultura (MESSK) Longuinhos dos Santos, hateten ministériu fó ona fleksibilidade bá estudante sira ne’ebé hakarak fila ba ida-idak nia munisípiu, maibé tenke hetan uluk teste swab.

Longuinhos dos Santos esplika teste swab ne’e depende bá reitór sira iha Instituisaun Ensinu Superior Públiku no Privadu (IESPP), katak baihira hatama lalais dadus estudante sira ne’ebé hakarak fila ba munisípiu tarde liu loron 09 abríl 2021 no MESSK bele koordena ho Sentru Integradu Jestaun Krize-Sala Situasaun (CIGC-SS) no Ministériu Saúde hodi deside data atu  halo teste swab ba estudante sira.

“Ami seidauk deside loron atu halo teste swab ba estudante sira, maibé ami fó ona loron ikus ba IESPP sira atu hatama dadus ka lista estudante sira atu fila ba munisípiu tarde liu mak loron 09 abríl 2021,” Ministru Longuinhos dos Santos informa ba  jornalista sira iha salaun enkontru MESSK, Dili, sábadu ne’e.

Tuir nia katak estudante sira ne’ebé hakarak fila bá munisípiu ne’e la’ós obrigatóriu, maibé ne’e pedidu estudante sira-nian, entaun MESSK kumpre saida mak estudante sira husu. Tanba ne’e mak MESSK bolu urjente reitór sira hodi diskute asuntu ne’e para fó fleksibilidade bá estudante sira atu fila ba sira ida-idak nia  munisípiu.

Longuinhos dos Santos dehan kona-ba dadus estudante sira-ne’e parte IESPP bele haruka liuhosi online, bele mós direita haruka mai ekipa tékniku dirasaun jerál Ensinu Superior nian no viajen estudante sira nian.

Nia mós husu bá estudante sira bainhira to’o iha munisípiu kontinua akompaña nafatin informasaun hodi hein orientasaun hosi MESSK maka foin bele fila-fali mai Dili.

Simu tan lista foun estudante sira hela iha kost 6.124

Ministériu Ensinu Superior Siénsia no Kultura (MESSK) simu tan lista foun estudante ne’ebé hela iha kost purvolta 6.124, maibé lista sira-ne’e presiza halo analiza atu labele iha naran dobru.

“Ami presiza halo analiza ba lista faze daruak no terseiru, tanba ita atu prevene naran dobru ita-nia alin estudante sira-nian purvolta 6.124 ne’e atu prevene naran dobru entaun ita presiza halo kualifikasaun ba lista ne’e,” Ministru Longuinhos dos Santos hateten.

Nia afirma katak lista estudante hela iha kost faze dahuluk ne’ebé MESSK submete ona ba Ministériu Solidariedade, Sosiál no Inkluzaun (MSSI) purvolta 5.587 mak hetan ona distribuisaun foos hosi MSSI.

“Ohin, kontinua halo tan distribuisaun foos ba estudante sira  iha UNTL ne’ebé hela iha kost, ne’ebé sei iha tan oportunidade loron aban ba oin MSSI sei distribui nafatin,” Ministru Longuinhos dos Santos tenik.

Foos ne’ebé MSSI utiliza hodi distribui bá estudante sir- ne’e foos Governu nian, ne’ebé mai hosi Sentru Lojístika Nasionál (CLN) ne’ebé asegura hela iha armazén sira Estadu nian.

Jornalista       : Tomé Amado

Editór             : Francisco Simões

 

HAKEREK NO HATÁN

Please enter your comment!
Please enter your name here