Prezidente Konsellu Diretiva Nasionál Partidu CNRT, Dionísio da Costa Babo oares. Imajen Tatoli/António Gonçalves

DILI, 03 abríl 2021 (TATOLI) — Partidu Congresso Nacional de Reconstrução de Timorense (CNRT) lideradu Kay Rala Xanana Gusmão, solidariza ho povu no estudante sira iha situasaun pandemia globál surtu COVID-19 tanba ema barak menus ai-han.

“CNRT solidariza povu no estudante sira no sente triste ho situasaun iha Semana Santa. Situasaun pandemia ne’e halo ema labele sai no tama mai Dili. Povu barak maka hasoru hela problema hamlaha no falta ai-han, liuliu sira-ne’ebé mai hosi foho. Estudante sira ne’ebé hosi foho mós tanba hela kleur iha Dili susar bele sustenta-an ho situasaun ida-ne’e,” Prezidente Konsellu Diretiva Nasionál Partidu CNRT, Dionísio da Costa Babo Soares, informa liuhosi komunikadu imprensa ne’ebé Agência Tatoli asesu, sábadu ne’e.

CNRT apresia ho medida ne’ebé Governu foti ona atu kontrola transmisaun virus COVID-19 ho rigorozu, maibé tuir Dionísio Babo, CNRT sente katak interese sidadaun nian, inkluindu sira-ne’ebé mai hosi foho no hela iha Dili laran presiza iha atensaun.

Dionísio Babo hateten, efeitu negativu hosi serka sanitária CNRT antesipa ona, no hato’o ona liuhosi plenária parlamentu atu Governu toma medida extra ho kuidadu.

CNRT lamenta tanba efeitu hosi kontrolu rigorozu ne’e halo ema balun lakon vida. Tanba ne’e, CNRT hato’o sentidu pezár ba família ne’ebé mate no mós partilla sentimentu solidariedade ho estudante sira no maluk sira-ne’ebé serkadu hela iha Dili.

Notísia Relevante : Euclides Belo: Matebian Filomena nia uma-laran laiha duni hahán

CNRT husu atu Governu bele halo esforsu no kontrola situasaun iha sosiedade hanesan Dili ne’ebé laiha meiu subsisténsia. Tanba sujere atu Governu, define prioridade no tau atensaun ba rezolve tiha problema hamlaha.

Dionísio akresenta, Governu presiza haree meiu hodi fasilita teste PCR-Swab iha área fronteirisa entre munisípiu no halo esplikasaun liuhosi mídia maka’as liután kona-ba ameasa virus COVID-19 nian.

“Prioridade ne’ebé temi iha leten, husu atu; primeiru Governu aloka fundu hodi fó asisténsia individuál no familiár ba ema sira-ne’ebé servisu laiha ho kondisaun hela de’it iha uma (dezempregu).  Segundu, Governu bele permite abertura sentru movies de venda de produtos de consumo hodi ema ba sosa sasán, no bele ajuda aplikasaun serka sanitária,” CNRT sujere liuhosi komunikadu ne’e.

Governu mós presiza loke pontu iha área fronteirisa entre munisípiu hodi fasilita transferénsia produtu agríkola orgánika hosi munisípiu mai Dili no nesesidade bázika seluk hosi Dili ba foho.

“Atu evita dezobediénsia sosiál hanesan iha loron 02 abríl,  CNRT hamutuk ho Maun Boot Xanana Gusmão solidariza povu tomak no sei buka nafatin maneira atu rezolve povu no susar,” Dionísio da Costa Babo subliña.

Notísia Relevante : Governu bele uza OJE 2021 fó resposta urjénsia ba abitante sira

Jornalista   : Evaristo Soares Martins

Editór        : Francisco Simões 

HAKEREK NO HATÁN

Please enter your comment!
Please enter your name here