Sarani sira iha Rejiaun Administrativa Oé-Cuse halo via sakra (adora ai-krús) hosi Lifau ba Bukit Tengkorak (kalváriu). Imajen/Facebook: Marno Pasencia.

DILI, 02 abril 2021 (TATOLI)—Arsebispu Arkidioseze Metropolitana Dili, Don Virgílio do Carmo da Silva, hateten selebrasaun Jesus nia paixaun ne’e nu’udar reflesaun ba diálogu entre Jesus no Pilatus ne’ebé Evanjelista São João Nia Surat (kapítulu 18, 1-19) haktuir kona-ba reinu ne’ebé harii iha mundu nia valór no reinu ne’ebé harii ho valor lalehan ninian.

Don Virgílio hatutan, Jesus nia reinu la’ós maihosi kritériu mundu ninian ne’ebé prevalese ho forsa, violénsia, no injustisa atu domina sira-ne’ebé laiha kbiit, maibé reinu Maromak nian ne’ebé Jesus harii ne’e ho valór sira iha lalehan nia leten ho baze atu serví ema kbiit laek sira no sai hanesan servidór ida.

Notísia Relevante: Kinta-feira santa, Jesus Kristu hatudu “moris foun” no hanorin “domin”

Arsebispu ba Arkedioseze Metropolitana Dili, Don Virgílio do Carmo da Silva. Imajen Tatoli/Egas Cristovão.

“Jesus mai atu harii Nia (Maromak) reinu ne’e ninia baze mak servisu no sai servidór. Ema ne’ebé foti ba Nia tronu mak ida-ne’ebé atu serví. Horisehik, kinta-feira santa, ita haree Jesus mai atu harii ninia reinu hodi hakne’ak iha Nia eskolante sira-nia ain no fase sira-nia ain,” Don Virgílio do Carmo da Silva hato’o reflesaun ida-ne’e liuhosi ninia ómilia bainhira preside selebrasaun paixaun Nain ninian, iha Katedral Imaculada Conçeição, Dili, sesta ne’e.

Don Virgílio heteten, Jesus mai atu serví no hanesan liurai atu fó sasin kona-ba lia-loos liuliu lia-loos kona-ba Maromak atu elimina buat falsu sira. Tanba, Jesus mai la’ós atu sai domindór maibé sai servidór ne’ebé atu serví.

“Ida-ne’ebé haree Jesus, haree ema-ne’ebé loos. Jesus mai fó sasin kona-ba Maromak loos no ema loos. Ema-ne’ebé fó sasin kona-ba Jesus iha nia moris, ema-ne’ebé fiel ba Jesus nia identidade iha nia moris. Jesus mai iha mundu atu fó sasin kona-ba Maromak. Jesus nia prezensa atu kansela lia falsu katak ida-ne’ebé haree Jesus nia haree Maromak ne’ebée loos. Jesus mai la’os dominadór maibé servidór,” nia esplika.

Aleinde ne’e, Don Virgílio esplika, bainhira haree no kontempla Jesus nia flajelasaun no ema hale’u ai-tarak iha Jesus nia ulun ne’e, atu haree liu ba Jesus Nia domin ba ema maksalak sira duké haree ba ema-nia kruelidade ne’ebé fó terus ba Jesus.

“Tuir Judeu sira-nia toman, bainhira hafutar ho koroa ne’e hafutar ho osan-mean. Sinál poder mundu ida-ne’e ninian no simbólu Gloria. Maibé sira tau no hale’u Jesus nia ulun ho ai-tarak. Ita haree ba ita ema hatán ba Maromak nia di’ak ne’ebé fó ba ita, ita hatán ho krueldade. Tanba ita-ema nia ambisaun dalaruma halo ita haluha tiha nia-aan hanesan Maromak,” amu bispu hateten.

Ba poder mundu nian, Don Virgílio haklaken hodi hasara tuir Jesus nia liafuan ne’ebé evanjelista São João haktuir katak, se kbiit ne’e la mai hosi leten (Maromak) karik ema sei labele halo buat ida.

“Jesus hateten ba Pilatus; Kbiit ne’ebé la mai hosi leten karik, ó labele halo buat ida. Ne’eduni ida-ne’ebé saran ha’u ba ó liman, nia salan mak boot liu ó-nian. Poder ne’ebé ó iha rai ne’e boot duni, maibé lalehan mak guia ó. Ó-nia poder ne’ebé agora ó kaer ne’e iha duni, maibé akontesimentu agora daudaun ne’ebé lori ha’u ba mate ne’e, iha leten (Maromak) mak guia hela. Tanba liuhosi dalan ida-ne’e mak ha’u sei lori salvasaun ba iha mundu ne’e,” Don Virgilio haktuir.

Don Virgílio hateten, Jesus lori salvasaun ba mundu tanba iha selebrasaun Jesus nia paixaun ne’e, Jesus kontempla Maromak ninia domin liuhosi realizasaun ema hedi Nia iha krúz no mate iha kalváriu.

“Loron di’ak ida mai ita, atu kontempla Maromak ninia domin liuhosi Jesus ninia realizasaun mate iha kalváriu. Domin ida espozu ninian, tanba nia hadomi tebes povu Israél kreda umanidade hodi saran ninia moris tomak ne’ebé laiha rezerva. Mai ita aprende atu reflete fali erru Pilatus no mós eru ulun boot saserdote sira-nian, atu ita aprende oinsá mak ita bele loke ita-nia aan ba mundu foun, reinu foun ne’ebé ita-nain Jesus Kristu mai atu harii. Reinu atu servi, la’os reinu atu domina. Reinu prontu atu saran nia aan ba maluk sira,” nia esplika.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here