Ministra Saúde, Odete Maria Freitas Belo, akompaña hosi reprezentante UNICEF iha Timor-Leste, Bilal Aurang Zen Durrani, halo observasaun ba sala malirin ne’ebé instaladu iha armazén sentrál SAMES Kampung Alor, kinta (01/04/21). Imajen Tatoli/António Gonçalves.

DILI, 01 abríl 2021 (TATOLI)—Fundu Nasaun Unida ba Infánsia (UNICEF), entrega ona ekipamentu Cool-room no Freezer-room ba Ministériu Saúde (MS), iha armazén sentrál Serbisu Autónomu Medikametu Ekipamentu Saúde (SAMES), Kampung Alor, Dili.

Ekipamentu ne’ebé sei uza hodi rai ai-moruk vasina AstraZeneca ne’e, entrega hosi reprezentante UNICEF iha Timor-Leste (TL), Bilal Aurang Zen Durrani, no simu direta hosi Ministra Saúde, Odete Maria Freitas Belo, akompaña hosi Vise-Ministru Saúde, Bonifácio ‘Maucoli’ dos Reis.

Notísia relevante:AstraZeneca dozes rihun 24 sei to’o TL iha segunda

Bilal Aurang Zen Durrani, hateten UNICEF iha papél importante atu dezenvolve hodi asegura korrente malirin, liu-liu funsionamentu AstraZeneca iha TL, iha momentu krítiku ida-ne’e.

UNICEF rekoñese katak, ekipamentu hirak ne’e instaladu tanba apoiu hosi parseiru-sira inklui Governu Timor Leste rasik.

“Agradese ba doadór-sira ne’ebé fasilita ona hodi instala ekipamentu hirak-ne’e no ohin entrega ba Ministériu Saúde,’’ nia agradese.

Nune’e mós Ministra Saúde, Odete Maria Freitas Belo, hateten ekipamentu hanesan sala marilin no mós zeleira malirin ne’e importante atu bele asegura ai-moruk vasina AstraZeneca, ne’ebé Governu sei uza hodi halo imunizasaun ba populasaun tomak.

“Ita-nia preparasaun ne’e la’ós foin, maibé liu hosi dalan ida ne’ebé naruk, no hetan aprovasaun hosi Konsellu Ministru atu bele realiza iha tempu badak,” Ministra Saúde hateten.

Entretantu, sala malirin ne’e instaladu iha armazén sentrál SAMES hosi kompañia Startec Enterprise tanba hetan konfiansa hosi UNICEF, ne’ebé iha esperiénsia espesiál ba área instalasaun no manutensaun.

Materiál no ekipamentu ne’ebé uza hodi halo instalasaun ne’e mai hosi UNICEF ho orsamentu rihun $8-resin.

Instalasaun ne’e kompletu ho kurum rua, ida ba temperatura normál no ida seluk ba temperatura malirin menus grau-sélsiu 20.

Tuir planu, UNICEF liuhosi COVAX facility sei transporta ai-moruk vasinasaun COVID-19 ho tipu AstraZeneca, hamutuk dozes rihun 24 mai Timor-Leste (TL), ne’ebé sei to’o TL iha segunda (05/04/21).

Notísia relevante:COVAX Facility oferese millaun $7 ba vasinasaun AstraZeneca iha TL

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here