Pesoál saúde-sira iha munisípiu Dili, tama-sai bairru hodi halo vasinasaun ba labarik-sira. Imajen Tatoli/António Gonçalves.

DILI, 01 abríl 2021 (TATOLI)—Ministériu Saúde (MS), oras ne’e daudaun iha pesoál saúde hamutuk 5000-resin ne’ebé hala’o atendimentu públiku, hahú hosi postu saúde iha territóriu tomak to’o Hospital Nacional Guido Valadares (HNGV), inklui serbisu ba prevensaun surtu COVID-19.

“Signifika, ami-nia forsa taraballu hirak-ne’e prontu iha fasilidade saúde-sira atu halo prestasaun serbisu ba kuidadu saúde esensiál-sira no mós COVID-19,’’ Diretora rekursu umanu, MS, Tomásia de Sousa hateten ba jornalista Agência Tatoli iha knaar fatin, Caicoli, kinta ne’e.

Notísia relevante:MS sei rekruta profisionál saúde permanente 320

Númeru ne’e, parte MS konsidera forsa traballu sei menus tanba seidauk prienxe kritériu númeru rekursu umanu  ba atendimentu públiku tuir sistema nasionál saúde-nian, nune’e tuir planu longu prazu parte diresaun rekursu umanu sei kontinua halo rekrutamentu iha futuru.

Tomásia de Sousa  deskreve katak, hosi númeru profisionál saúde ne’ebé iha, kompostu hosi médiku jerál, médiku espesialista, parteira, enfermeiru, tékniku aliadu 4.100-resin  la inklui apoiu administrasaun.

“Sira-ne’e hosi nasionál to’o nível Munisípiu. Signifika, ami-nia forsa traballu ho karreira rejime jerál no espesiál 5.000-resin,” nia subliña.

Nia informa katak, MS mós halo kontratu ho profisionál saúde atus-tolu hodi fó apoiu iha kuarentena no izolamentu ba reforsa serbisu prevensaun COVID-19.

Haree ba númeru kazu pozitivu ne’ebé kontinua aumenta kada loron, MS mós estabelese ona fatin izolamentu no kuarentena iha Munisípiu hotu, nune’e parte rekursu umanu prepara ona mapa pesoál, oinsá responde no prienxe fasilidade saúde-hirak ne’ebé iha.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here