Ponte kotu tanba mota Sumaku sobu iha domingu (28/03/21). Imajen/facebook.

DILI, 01 abríl 2021 (TATOLI)—Udan boot iha semana kotuk, halo mota Sumaku boot no sobu ponte ne’ebé liga postu administrativu Lakluta, Munisípiu Viqueque ho suku Kribas postu administrativu Manatuto, Munisípiu Manatuto.

Diretór Serbisu Edukasaun Munisípiu Viqueque, Emídio Amaral observa katak, hafoin ponte ne’e kotu iha domingu (28/03) tanba udan boot durante loron haat, difikulta movimentu transporte públiku, inklui komunidade ne’ebé baibain utiliza ponte ne’e hosi Lakluta mai Manatuto no Dili.

Notísia relevante:Mota Marobo sobu ponte Bilimau difikulta movimentu komunidade

“Ita iha ne’e udan boot durante loron haat no ponte ne’e kotu. Maski komunidade ne’ebé la’o ain bele liu, maibé transporte públiku difísil atu liu,” Emídio Amaral hateten ba jornalista Agência Tatoli via telefónika, kinta ne’e.

Nia dehan, ponte ne’e rasik nu’udár ponte protokolu ne’ebé úniku atu populasaun hosi Lakluta utiliza hodi hakat-liu mai Manatuto no bele liu-mai Dili.

Emídio Amaral mós rekoñese katak, maski ponte ne’e rasik konstrui iha tempu ukun aan, maibé mota sobu beibeik no tama ona iha kategoria ne’ebé tenke hetan rehabilitasaun.

Informasaun ne’ebé nia hetan katak, antes ne’e autoridade postu administrativu Lakluta hato’o ona pedidu ba Ministériu Obra Públika (MOP) atu bele halo reabilitasaun, maibé seidauk iha informasaun ruma kona-bá pedidu ne’e.

Tanba ne’e, hanesan sidadaun ida iha Munisípiu Viqueque, maski oras ne’e iha hela situasuan serka sanitária, maibé hato’o nafatin ba Governu atu bele foti medida ruma, hodi fasilita movimentu komunidade bainhira serka sanitária termina.

Entretantu, postu administrativu Lakluta iha suku haat mak hanesan suku Ahik, Dilor, Lalini no Uma tolu ho totál populasaun tuir sensu uma-ka’in 2010, hamutuk 5.853, ne’ebé maioria utiliza ponte ne’e mai Manatuto no Dili.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here