Vítima ne’ebé hetan taa iha liman hala’o hela tratamentu intensivu iha HNGV. Imajen/Espesiál

DILI, 01 abríl 2021 (TATOLI)- Mane deskoñesidu ida lori katana taa kanek feto klosan na’in-tolu iha Merkadu Taibesi, Dili, kinta ne’e.

Asaun brutal ne’ebé akontese iha tuku 14:00  Otl, rezulta feto na’in-tolu sofre kanek todan iha kotuk laran, liman, kakorok no isin-lolon.

Hafoin taa kanek vítima sira, suspeitu deskoñesidu ne’e halai lakon no parte autoridade seguransa buka tuir ona suspeitu ninia paradeiru.

Iha akontesimentu ne’e, parte negosiante balun, inklui seguransa sira iha Merkadu Taibesi konsege halo atuasaun hodi salva vítima na’in-tolu hodi lori kedas ba hala’o tratamentu intensivu iha Ospitál Nasionál Guido Valadares (HNGV).

Vítima na’in-tolu ne’e; na’in-rua  nu’udar negosiante ho inisiál AXB ho RS ne’ebé hala’o atividade negósiu iha Merkadu Taibesi no vítima ho inisiál JC nu’udar kompradór.

Artur Mendonça Benevides, nu’udar sasin ka testemuña ba akontesimentu ne’e informa, problema ne’e akontese  derrepente de’it halo ema barak pániku no halai husik hela sira-nia baraka negósiu hodi salva aan.

“Derrepente de’it ema taa malu iha ami nia kotuk no ami halai namkari, tanba ema taa ona kolega na’in-tolu,” Artur  Mendonça Benevides, haktuir ba jornalista iha Merkadu Taibesi, Dili.

Informasaun ne’ebé Agência Tatoli rekolla iha lokál akontesimentu hosi sasin sira balun katak kazu ne’e iha indísiu ódiu vingansa. Maske nune’e, sasin sira-ne’e dehan, vítima na’in-tolu  maka bele hatene liu motivu hosi kazu ne’e.

Polísia Eskuadra Nain Feto, Dili, koloka ona nia membru  sira iha Merkadu Taibesi, hodi koordena  mós ho parte Seguransa Merkadu, Ofisiál Polísia Suku (OPS) no Membru Konsellu Polisiamentu Komunitária (KPK) hodi asegura situasaun iha merkadu laran no buka tuir suspeitu ne’e.

 Jornalista   : Eugénio Pereira

Editór        : Francisco Simões

 

PUBLISIDADEiklan

HAKEREK NO HATÁN

Please enter your comment!
Please enter your name here