Konstrusaun Estrada Belulik Leten-Belulik Kraik. Imajen/DNEPCC

DILI, 01 abríl 2021 (TATOLI)-Projetu konstrusaun loke estrada dirasaun suku Belulik leten to’o belulik kraik, postu administrativu Fatumean, munisípiu Covalima atinje ona 80%.

Diretór Nasionál Estrada, Ponte no Kontrolu Cheia, João Mário Gama de Sousa, hateten projetu konstrusaun estrada ne’e hahú iha loron 15 setembru 2017 to’o 15 setembru 2018, ne’ebé ezekuta hosi Kontratór Be’e Horis Unip. Lda.

“Ita-nia tékniku sira haree progresu fizíku iha terrenu atinje ona 80% ba estrada kilometru 9,16, tanba aterru hotu  no item serbisu drenajen, tembok penahan, Pipe Culvert no sub base course, maibé kontratu ho empreza ne’e seidauk to’o fui aspalt,” Diretór Nasionál ne’e informa ba Agéncia TATOLI, via telefónika, kinta ne’e.

Projetu ne’e ho kustu  $3.407.674,66, ne’ebé Governu liuhosi Ministériu Obra Públika (MOP) halo estensaun tempu to’o loron  31 agostu 2021.

Diretór Nasionál ne’e dehan, atu garante kualidade ba obra ne’e, maka MOP liuhosi Diresaun Estrada destaka supervisór iha terrenu hodi halo supervizaun ba aktividade serbisu projetu no halo koordenasaun nafatin ho Diresaun Peskiza  no dezenvolvimento ho Ajénsia Dezenvolvimentu Nasionál  (ADN).

Tuir Dirijente ne’e, kompañia halo ona pedidu  pagamentu dala-lima ho totál $1.815.413,20 ho persentajen 53,27%.

“Ita sei iha tan pedidu pagamentu  rua mak sei iha prosesu inspesaun no verifikasaun nia laran ho kada pagamentu ba da-neen $671.406,10 no dahituk hamutuk  $325.618,35,” nia akresenta.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here