Ilustrasaun ekipamentu laboratóriu. Imajen/Espesiál

DILI, 01 abríl 2021 (TATOLI)–Inspetór Jerál Autoridade Inspesaun no Fiskalizasaun Atividade Ekonómika Sanitária no Alimentar (AIFAESA) Ernesto Monteiro, komprometidu sei halo proposta ba Governu hodi apoiu fasililidade labotóriu iha Tibar, hodi suporta serbisu.

Nia nota katak, Governu harii ona laboratóriu iha Tibar atu kontrolu kualidade ai-han, desde 2011 maibé to’o agora seidauk iha ekipamentu.

“Ha’u haree AIFAESA ohin iha lista kuaze 111, maibé seidauk funsiona ho másimu tanba de’it ekipamentu laiha. Tanba ne’e, ha’u-nia manadatu sei halo proposta Ministériu Koordenadór Asuntu Ekonómiku (MKAE) atubele iha legalidade, nune’e tékniku sira iha laboraóoriu bele hala’o knaar,” Inspetór Jerál informa iha salaun AIFAESA, Matadoru, hafoin simu pose, kinta ne’e.

Notísia relevante: MKAE husu Inspetór Jerál AIFAESA garante ai-han prenxe padraun kualidade

Durante ne’e, AIFAESA halo kooperasaun ho Ministériu Saúde (MS) no Ministériu Agrikultura no Peska (MAP) atubele hala’o serbisu balun.

Autoridade ne’e hala’o misaun proteje konsumidór no konkorénsia leál entre operadór ekonómiku atu kumpre lejislasaun sira ne’ebé regula atividade ekonómika.

Aleinde ne’e, Inspetór Jerál iha mós hanoin atu define padraun sasán bazeia ba kualidade.

“Bainhira ita determina kualidade la di’ak tau 0, maibé determina kualidade a’as liu maka 10%. Ita tenke determina ninia padraun, karik bele halo proposta ba ministériu tutela atu kria Dekretu Governu ka Dektretu Lei, ho padraun nasionál tanba Timor-Leste rasik seidauk iha lei kona-ba padraun sasán ne’ebé ita prodús, tanba ne’e presiza regulariza liuhosi padraun nasionál,” nia akresenta.

Inspektór Jerál emposadu hakarak aposta mós ba legalidade no kuantidade.

“Ita hakarak operadór ekonómika tenke iha legalidade maka halo operasaun no kualidade ita tenke garante direitu konsumidór,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here