Ilustrasaun vasina COVID-19. Imajen/Espesiál

DILI, 01 abríl 2021 (TATOLI)—Sala Situasaun-Sentru Integradu Jestaun Krize (CIGC, sigla portugés) rekomenda ba Governu atu estabelese komisaun espesializa ida hodi halo monitorizasaun ba implementasaun vasina kontra COVID-19 iha Timor-Leste.

“Sentru Integradu Jestaun Krize rekomenda ba Governu atu harii komisaun espesializada ida hodi monitoriza no superviziona vasina ne’ebé sei aplika iha Timor-Leste ho tarjetu 80% ne’ebé Governu nia responsabilidade,” Koordenadór Estadu-Maiór Sala Situasaun-CIGC, Komodoro Donaciano Costa Gomes ‘Pedro Klamar Fuik’, relata iha ámbitu reuniaun Konsellu Ministru, via virtuál, hanesan haktuir iha nota ne’ebé Agência TATOLI asesu, kinta ne’e.

Tuir atuál Diretór Institutu Defeza Nasionál (IDN), Timor-Leste bele salva guarda ninia interese nasionál no hamenus dependénsia ba rai-li’úr, nune’e mós halakon estatutu ba kbi’it laek sira.

Notísia relevante: AstraZeneca dozes rihun 24 sei to’o TL iha segunda

Alende ne’e, CIGC mós propoin hala’o aktividade esensiál ba moras hahú dadeer tuku 09:00 to’o lorokraik tuku 14:00, kuandu liu ne’e tenke rekolla obrigatóriu.

Koordenadór Estadu-Maiór konsidera Timor-Leste nia kazu ba propagasaun surtu COVID-19 iha hela kontrola nia laran tanba to’o agora medida ne’ebé adopta bele halo kontensaun ba cluster sira.

Tuir planu, Fundu Nasaun Unida ba Infánsia (UNICEF, sigla inglés) liuhosi COVAX Facility, sei transporta vasina COVID-19 ho tipu AstraZeneca, hamutuk doze 24.000 mai Timor-Leste, ne’ebé tuir planu sei to’o iha segunda (05/04).

Timor-Leste adere ona ba mekanizmu COVAX Facility, ne’ebé 20% populasaun sei asesu gratuita vasina kontra COVID-19 hosi programa ne’e, enkuantu 80% Governu halo akizasaun.

Planu vasina iha prinsípiu universál, gratuita, asesibilidade no ekuidade, maibé vasina ne’e la’ós obrigatóriu, ne’ebé sei administra tuituir malu ba grupu prioritáriu sira to’o populasaun elejível hodi bele hetan asesu hotu.

Iha planu nasionál vasinasaun kontra COVID-19, prevee katak ema sira ho idade 18 ba leten sei hetan vasina to’o finál tinan 2021, enkuantu ba menór tinan 18 sei vasina iha tinan 2022, maibé ninia planu sei depende ba rekomensadaun téknika hosi Organizasaun Mundiál Saúde (OMS).

Iha faze dahuluk vasina sei konre populasaun 8%, ne’ebé 3% korresponde ba traballadór liña frente, liuliu funsionáriu sira ne’ebé serbisu iha unidade kuarentena no izolamentu, ka iha postu entrada hanesan aeroportu, portu no terrestre, no 5% sei abranje ba populasaun ne’ebé hela iha área besik fronteira terrestre no ema sira ne’ebé konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

Aleinde ne’e, iha faze daruak sei abranje mós, profisionál saúde, profesór, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro.

Grupu sira ne’ebé integra iha faze datoluk hamutuk 80% populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Vasina ne’e sei efetua iha estabelesimentu Servisu Nasionál Saúde, ne’ebé sei aloka ekipa treinada vasinasaun sira, hodi haree espesifikasaun vasina kontra COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here