Amaro da Costa “Susar” mobiliza masa apoia Xanana iha edifísiu PGR, Colmera, Dili, segunda (29/03/2021). Imajen/Tatoli/Eugénio Pereira

DILI, 01 abríl 2021 (TATOLI)- Komandu Jerál Polísia Nasionál Timor-Leste (PNTL) liuhosi Servisu Investigasaun Kriminál Nasionál (SIKN), notifika Amaro da Costa “Susar” nu’udar suspeitu, tanba konsidera viola regra serka sanitária (SS) bainhira mobiliza masa fó apoiu ba Kay Rala Xanana Gusmão,  iha Edifísiu Prokuradór Jerál Repúblika (PGR) nia oin, segunda (29/03).

Notísia Relevante : Xanana husu polísia haruka fila apoiante sira

Amaro “Susar” nu’udar mós  portavós Klibur Tane Aas Obra Maun Boot Kay Rala Xanana Gusmão (KTAOMX) akompaña hosi nia advogadu privadu,  kinta (01/04),  ba kumpre mandadu notifikasaun PNTL nian hodi presta deklarasaun iha SIKN hodi kumpre ba Lei artigu 91 to’o 94 iha Kódigu Prosesu Penal.

Portavós Komandu Jerál PNTL, Superintendente Xefe, Arnaldo de Araújo, hateten notifikasaun ba Amaro “Susar” ne’e hodi implementa lei númeru 09/2009, lei Orgánika PNTL.

“Polisia konsidera suspeitu viola regra serka sanitária ka Estadu Emerjénsia ne’ebé aplika ba ema hotu tenke kumpre dekretu Governu númeru 6/2021/2 Marsu 2021, junta rezolusaun Governu númeru 15.2021 data 15 Marsu, ne’ebé impoin serka sanitária sira no konfinamentu domisiliáriu,” Superintendente Xefe Arnaldo de Araújo, informa ba jornalista iha Komandu Jerál PNTL, Dili.

Amaro “Susar” hanesan mós membru FALINTIL ida rekoñese mobiliza joven sira hodi fó votu solidariedade ba Komandante Em-Xefe FALINTIL, Kay Rala Xanana Gusmão, ne’ebé ba hatán iha Ministériu Públiku ho baze ba keixa hosi Mari Bin Amude Alkatiri, atuál  Sekretáriu Jerál Partidu FRETILIN.

Amaro “Susar” hateten, asaun ne’ebé sira halo konsidera asaun importante ne’ebé sira hatudu durante funu tinan 24 hodi proteje Xanana nu’udar sira-nia Komandante.

“Ami veteranu nunka atu husik nia (Xanana). Ha’u Susar mak ko’alia, ami la husik maun Xanana. Ami ba iha Ministériu Públiku hodi reafirma ami-nia pozisaun, fó solidariedade ba nia nu’udar ami-nia komandante FALINTIL,” Amaro “Susar” afirma tan.

Susar hateten, nia prontu koopera nafatin ho autoridade seguransa hodi responsabiliza ba asaun ne’ebé nia halo bainhira autoridade prosesa kazu ne’e tuir lei.

Kay Rala Xanana Gusmão, prezidente partidu Kongresu Nasionál Rekonstrusaun Timorense (CNRT, sigla portugés) ba hatán iha MP hanesan testemuña kona-ba keixa ne’ebé hatama hosi Mari Alkatiri kontra membru Bankada CNRT ho membru sira hosi Komisaun Polítika Nasionál (CPN)-CNRT ne’ebé pronúnsia ba públiku hodi akuza Mari Alkatiri simu subornu millaun $2.5 hosi kompañia ConocoPhilips.

Notísia Relevante : Xanana husu MP notifika fali nia hanesan arguidu

Jornalista   : Eugénio Pereira

Editór           : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here