Faluk Lourença Mota, hili hela batar ne’ebé ahi-han mutuk ho nia uma iha Aldeia Kaku, Suku Saniri, Postu Administrativu Balibo, Munisípiu Bobonaro. Imajen/Honorio Maia

DILI, 01 abríl 2021 (TATOLI) –Faluk ida nia uma iha Aldeia Kaku, Suku Saniri,  Postu Administrativu Balibo, Munisípiu Bobonaro, ahi-han to’o mutuk no la konsege salva sasán uma-laran, inklui ai-han sira.

Lourença Mota (91) ho nia oan-mane Cornelis Lourenço, hela ho de’it ona ropa isin-lolon no stoke ai-hahán sira ne’ebé durante ne’e sira halibur no rai di’ak,  hanesan foos lokál uitoan, batar no nesesidade bázika sira seluk, la konsege salva iha inséndiu ne’ebé akontese ba sira-nia uma iha kuarta (31/03), tuku 22:23 Otl.

Faluk Lourença Mota, hili hela batar balun ne’ebé nia haree di’ak atu bele rai ba nia ho nia oan halo ba han. Imajen/Honorio Maia

Informasaun ne’ebé haktuir hosi reprezentante juventude nu’udar família rasik hosi faluk ne’e, Honorio Maia,  katak inséndiu ne’e akontese tanba avó faluk ne’e ho nia oan-mane, Cornelis Lourenço, sunu hela ahi hodi te’in hahán kalan nian, no sira haluha atu hamate ahi,  nune’e iha kalan ne’e derrepente sira hakfodak ahi lakan boot han ona uma.

“Kalan ne’e sira te’in hela hahán depois sudi hela ahi hodi tanu batar ne’ebé rai hela iha hadak leten, derrepente kalan toba ona maka ahi han uma no sira halai sai ho roupa isin-lolon de’it,” Honorio haktuir ba Agência Tatoli via telefone, kinta ne’e.

Nia dehan, faluk ne’e ho nia oan nu’udar família kbiit laek no nia katuas oan Lourenço Loteloe, mate iha tinan 2004.

“Avó feto ne’e ho nia oan Cornelis Lourenço, moris susar tebes. Agora ahi-han tiha ona sira-nia uma no sira-nia ai-han hanesan bukae ba sira loron-lorin nian. Espera bele iha solidariedade hosi viziñu knua-laran, sosiedade ho mós parte kompetente sira,” Honorio hateten.

Faluk Lourença Mota, hili no halibur hela batar balun ne’ebé nia haree di’ak atu bele rai ba nia ho nia oan han. Imajen/Honorio Maia

Iha akontesimentu ne’e, viziñu no família balun konsege ajuda avó Lourença ho nia oan mane hodi salva uluk sira-nia vida no lori ona ba aprezenta iha autoridade suku hodi submete dadus no parte Ofisiál Polísia Suku (OPS) mós to’o kedas fatin akontesimentu hodi halo levantamentu.

Avó faluk Lourença husu ba Governu liuhosi Ministériu Solidariedade Sosiál no Inkluzaun (MSSI) atu bele fó apoiu emerjénsia nian hodi  responde netik sira na’in-rua nia nesesidade loron-loron nian.

“Ha’u laiha ona kbiit, batar barak maka ahi-han mutuk, ha’u rasik hili rekolla nafatin batar balun ne’ebé sei di’ak atu bele konsumu. Karik Estadu bele ajuda ha’u,” Honorio haktuir avó Lourença  nia lia-menon.

Agência Tatoli konfirma mós kazu inséndiu ne’e ba Xefe Aldeia Kaku, Valentino Domingos ho Xefe Suku Saniri, Agosto Dato Buti, dehan, sira-nia parte rekolla de’it dadus no sei aprezenta ba Autoridade Munisípiu Bobonaro atu bele apoia vítima sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here