Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XII hosi Prezidente Repúblika, iha sala plenária PN, kuarta (31/03). Imajen TATOLI/Egas Cristóvão

DILI, 31 marsu 2021 (TATOLI)—Primeiru-Ministru (PM), Taur Matan Ruak, agradese  ba apoiu Deputadu sira iha Parlamentu Nasionál, ba estensaun Estadu Emerjénsia (EE) da-XII tanba hanesan dalan ba prevensaun no luta kombate COVID-19.

“Lori Governu nia naran, hakarak agradese apoiu hirak ne’e tanba Prezidente Repúblika no Governu hakarak Estadu Emerejénsia. Apoia ida-ne’e la saugate tanba ita konsege evita mate no espera bele kontinua nafatin,” PM Taur hateten iha debate estensaun EE da-XII iha sala plenária, Parlamentu Nasionál (PN), kuarta ne’e.

Renovasaun deklarasaun EE aprovadu ho rezultadu votasaun nominál a-favór 49, kontra 0 no abstesaun 14.

Tuir Xefe Governu, atu kombate COVID-19 iha dalan rua hanesan komportamentu sidadaun sira nian tuir no kumpre medida ezekusaun EE no vasina.

Notísia relevante: PN autoriza Prezidente Repúblika dekreta Estadu Emerjénsia ba dala-XII

PM rekoñese, EE dahuluk to’o agora sakrifika direitu no liberdade sidadaun ne’ebé fora hosi normalidade, la’ós iha Timor-Leste de’it maibé iha mundu tomak.

“Se ita haree didi’ak liuhosi sakrifísiu lori rezultadu di’ak ba ita, hafoin fulan 12 enkuantu país sira seluk hakoi sira-nia mate maibé Timór seidauk iha ida mak mate, maski iha númeru kazu aumenta,” nia akresenta.

Xefe ezekutivu konsidera, buat di’ak tenke lori sakrifísiu mak hetan maibé tanba sakrifísiu laiha mak nunka iha buat di’ak.

“Hanesan mós ita ukun-an, ita lakon ema kuaze 200.000, maibé ba ita sira ne’ebé sei moris hela ohin loron sei bele haree mundu no rai ne’e nia di’ak, maibé ita sakrifika ita-nia maluk sira barak. Entaun buat di’ak lori sakrifisiu no ba ne’ebé ladi’ak la presiza sakrifísiu,” nia hatutan.

Nune’e, Governu rejista preokupasaun sidadaun hotu inklui Deputadu sira, atu halo diskusaun kle’an hodi mellora atu evita sidadaun mate tanba COVID-19.

Projetu-lei númeru 26/v/3a, artigu 3 (durasaun) hosi artigu 11 iha lei autorizasaun ne’e prevee, revonasaun deklarasaun EE ba períodu loron 30 tan, hahú hosi tuku 00:00 loron 03 abríl 2021 (sabádu) no termina iha tuku 23:59 iha loron 02 maiu 2021 (domingu) ho parsialmente suspensaun ezersísiu balun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here