Deputada Bankada Fretilin no Prezidente Komisaun C (Finansa Públika), Maria Angelica Rangel. Imajen/ Tatoli Egas Cristovao.

DILI, 31 marsu 2021 (TATOLI)—Reprezentante Povu iha uma fukun Parlamentu Nasionál husu Governu atu hanoin didi’ak molok halo estensaun ba serka sanitária no konfinamentu obrigatóriu ba múnisípiu tolu liliu iha kapitál Dili, tanba durante ne’e fó impaktu boot ba atividade ekonomia.

“Ami husu ba Governu atu haree didi’ak serka sanitária ne’ebé daudaun ne’e iha munisípiu tolu hanesan Dili, Baucau no Viqueque tanba serka sanitária ne’e halo implikasaun boot ba atividade ekonomia rai-laran nian. Laiha sirkulasaun ema lori ai-haan atu mai faan iha Dili, ema barak lakon servisu, tanba ne’e mak Governu tenke hanoin didi’ak hodi estende serka sanitaria liuliu iha Kapitál Dili,” Deputada Bankada FRETILIN, Maria Angélica Rangel, levanta liuhosi debate estensaun Estadu Emerjénsia ba dala-XII, iha Parlamentu Nasionál, kuarta ne’e.

Mari Angélica Rangel hatutan, Governu bele halo serka sanitaria no konfinamentu obrigatóriu ba suku sira-ne’ebé afetadu COVID-19 maibé labele ba Dili laran tomak.

“Se Governu hanoin halo serka sanitária ba Dili tomak, haruka ministru fó ferias ba alunu sira fulan-tolu atu nune’e ita bele haree. Tanba, senáriu piór ne’ebé durante ne’e ita haree katak implikasaun boot. Ami triste kuandu Ministra Saúde ko’alia senáriu piór ami tenke tau iha lona okos,” nia kestiona.

Deputada Bankada FRETILIN ne’e ko’alia triste tanba Parlamentu Nasionál aprova osan iha levantamentu dahuluk no daruak tau iha kapitál dezenvolvimentu millaun $10-resin hodi halo reabilitasaun ba fatin hodi hatama ema bainhira hasoru senáriu mais piór.

“Tanba ne’e mak ami ezije ba Governu por favór haree didi’ak serka sanitária. Nune’e, Sentru Jestaun ba Krize fó autorizasaun ba ema atu sai ba munisípiu, nia atendimentu kleur tebes tanba pedidu sira-ne’ebé hatama ne’e la’ós urjente. Urjente de’it mak família mate no família moras. Agora ema sira-ne’ebé servisu hetan apoiu hosi kapitál Dili, ema bele mate hamlaha. Se ema mate atu husu responsabilidade ba sé,” nia fó hanoin ba Governu.

Entretantu Deputada Bankada CNRT, Deputada Carmelita Caetano Moniz, hateten estensaun Estadu Emerjénsia dala barak ona ho hanoin atu kombate COVID-19 maibé hasoru obstákulu katak nafatin de’it hosi tinan kotuk até agora.

Nia fundamenta, obstákulu ne’e haree hosi relatóriu Ministériu Saúde nian ne’ebé previstu prosesu aprovizionamentu la’o-tuir lei rejime jerál aprovizionamentu normál ne’ebé prezudika prosesu situasaun emerjénsia.

“Ita iha obstákulu tanba Governu la hatene implementa lei, laiha kapasidade no laiha esperiénsia. Ita iha dekretu-lei aprovizionamentu ne’ebé ke fó biban ba Governu atu halo aprovizionamentu espesiál ka halo ajudikasaun direta ba situasaun emerjénsia ba fasilidade kuarentena, infraestrutura fatin izolamentu, medikamentu no ekipamentu sira. Ne’e bele halo aprovizionamentu espesiál,” nia akresenta.

Maibé, nia preokupa tanba Governu labele halo aprovizionamentu espesiál ba situasaun ne’ebe ke emerjénsia hodi salva ema hotu nia vida.

“Kontráriu, Governu halo aprovizionamentu espesiál ba fali cesta bázika. Loloos ne’e esensiál ba iha fundu COVID-19 hamutuk millaun $220 labele halo aprovizionamentu,” Deputada Carmelita krítika Governu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here