Ilustrasaun.

DILI, 31 marsu 2021 (TATOLI)—Prezidente Conselho de Imprensa (CI), Virgílio Guterres, apela ba mídia no jornalista sira atu evita notísia ho títulu “sensasionál” ne’ebé dala barak atu halo públiku lee barak maibé titulu ne’e la korresponde ba konteúdu no faktu.

Notísia Relevante: CI husu jornalista sira kumpre kódigu étika jornalistíka

“Ha’u apela ba jornalista sira, para ona ho títulu notísia sensasionál. La sala mosu títulu atrativu maibé tenke korresponde ho konteúdu notísia no mós korresponde ho faktu ne’ebé iha,” Virgílio da Silva Guterres hateten ba Agência TATOLI iha nia knaar fatin, Quintal Boot, Dili, kuarta ne’e.

Virgílio da Silva hateten, maske iha liberdade atu atrai ema ho títulu notísia sensasionál no atarativu para ema atu lee notísia maibé tenke halo seriedade ho responsabilidade, no respeitu nafatin padraun kódigu étika jornalístika iha atividade jornalístika ho podusaun notísia sira hodi kumpre valór notísia informativu no edukativu.

Nia dehan, iha serka sanitaria ne’e, jornalista sira mós tenke konsiente katak sosiedade ne’ebé iha konviksaun politíku ne’e hosi tinan 2000 mai to’o agora ne’e la’o hela, entre partidu polítiku no líder sira han malu hela de’it, entaun jornalista sira iha obrigasaun atu hato’o informasaun sira-ne’ebé loloos no momoos atu kria armonia.

“Jornalista iha misaun ida katak fó informasaun sira-ne’ebé kria armonia. Jornalista labele halo ema konflitu hela de’it. Joranlista ne’ebé halo ema konflitu hela de’it ne’e dehan jornalizmu funu nian,” Prezidente Conselho de Imprensa ne’e hateten.

Tanba ne’e, nia husu ba jornalista sira tenke luta no enkoraja publiku atu respeita regra ne’ebé vigora ona, tanba luta atu prevene propagasaun COVID-19 ne’e la’ós médiku sira-nia knasr de’it maibé luta ema hotu-hotu nian inklui jornalista sira.

“Iha propagasaun ne’e, jornalista tenke luta no enkoraja ita-nia publiku sira atu oinsa hakruuk ba regra ne’ebé Governu implementa. Jornalista sira tenke hasa’e koñesimentu públiku nian kona-ba perigu vírus corona ne’e, atu ne’e ema bele proteje sira-nia aan liuhosi fase liman beibeik, uza máskara, halo distánsiamentu sosiál no fíziku entre ema ida ho ema seluk liu metru ida,” nia dehan.

Notísia Relevante: Serka sanitária, CI husu mídia kontribui informasaun loloos ba públiku

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here