Provedora, Jesuína Maria Ferreira Gomes ho Prokuradór Jerál Repúblika, José Ximenes, asina terku kooperasaun instituisaun rua iha edifísiu PGR, Colmera, Dili, sesta (05/02/2021). Imajen/Nelson de Sousa

DILI, 31 marsu 2021 (TATOLI) – Provedoria Direitu Umanu no Justisa (PDHJ) iha serteza katak Prezidente Repúblika (PR), Francisco Guterres “Lú Olo” sei nomeia ema ho kompetente ba kargu Prokuradór Jerál Repúblika (PGR, sigla portugés) periodu 2021-2025.

Notísia Relevante : JSMP prefere PGR foun kompetente no independente

PGR José da Costa Ximenes, nia mandatu sei termina iha fulan abríl, tinan ne’e, hafoin periodu dala-rua asume kargu ne’e, hosi 2013-2017 no 2017-2021.

Provedora Jesuína Maria Ferreira Gomes. Imajen/Portal Ofisiál PDHJ

“Ha’u iha serteza katak Prezidente Repúblika sei nomeia kandidatu/a iha altura kargu nian, ne’ebé mak kompetente tebes, no mós ho devér sira hodi kontinua nafatin servisu di’ak ne’ebé halo ona husi PGR atuál,’’ Provedora Jesuína Maria Ferreira Gomes hateten, kuarta (31/03), hodi responde Agência Tatoli nia pergunta sira ne’ebé envia liuhosi e-mail.

Provedora Jesuína Maria Ferreira Gomes, esplika tuir Konstituisaun Repúblika Demokrátika Timor-Leste (KRDTL) iha artigu 27.º mak estabelese katak PDHJ hanesan órgaun independente ida ne’ebé iha funsaun atu apresia no buka dalan atu atende sidadaun sira-nia keixa hasoru podér públiku, bele haree atu ida-idak la’o tuir lei ka lae, prevene injustisa no hala’o prosesu atu hadi’a injustisa.

Natureza PGR nian, nia hatutan, konforme previstu iha no artigu 132.º KRDTL, mak reprezenta Estadu, ezerse asaun penál, asegura defeza ba menór, auzente no inkapás sira, defende legalidade demokrátika no promove kumprimentu ba lei.

Bazeia ba Estatutu PDHJ nia rasik, iha artigu 33.º mak prevee obrigasaun ida ba kooperasaun entre instituisaun sira. Atu iha kooperasaun di’ak mak importante iha koordenasaun servisu ne’ebé efetivu ho PGR.

Provedora Jesuína Maria Ferreira Gomes, hateten durante mandatu atuál PGR nian, instituisaun rua ne’e konsege ona alkansa nivel aas ba kooperasaun ida, mak liuhosi motivasaun hodi halo formalizasaun ba memorandu entendimentu ida, nune’e bele ajusta servisu ne’ebé mak halo ona entre instituisaun rua ne’e.

Nia klarifika katak nomeasaun ba PGR foun la’ós kompeténsia PDHJ nian, maibé ne’e kompete ba Prezidente Repúblika nian, konforme artigu 132.º KRDTL, tanba ne’e la kabe ba PDHJ hodi halo espekulasaun kona-ba se sé de’it mak bele ka labele asume kna’ar hanesan PGR foun ba mandatu 2021-2025.

Bazeia ba Estatutu PDHJ nian, iha artigu 33.º (nú. 4), iha obrigasaun hodi enkamiña kazu sira ba PGR uainhira PDHJ nia investigasaun hatudu katak bele iha indísiu prátika ka ameasa ba prátika krime nian.

Tuir dadus PDHJ nian durante períodu 2020 enkamiña ona keixa hamutuk 35 ba PGR. Enkamiñamentu keixa sira ba PGR la inválida kontinuidade investigasaun ne’ebé realiza hosi PDHJ, tanba bele taka investigasaun hosi PDHJ bainhira kazu tama ona ba Tribunál.

Provedora Jesuína Maria Ferreira Gomes, la esplika detallu númeru kazu sira ne’ebé parte PDHJ enkamiña ba PGR oinsá ho ninia rezultadu, maibé durante prosesu penál, to’o ninia konkluzaun ba prosesu, PGR hato’o nafatin informasaun ba PDHJ liuhosi pontu fokál sira ne’ebé nomeadu hosi instituisaun rua.

PDHJ fiar katak lejizlasaun sira ne’ebé mak iha ona ne’e adekuada no fó ba PGR kapasidade hodi halo kna’ar sira iha asaun penál ho forma ne’ebé independente no iha integridade. Nune’e,  PDHJ hein katak PGR foun mai relasiona ho kooperasaun entre instituisaun rua ne’ebé iha ona hodi kontinua ho servisu di’ak ne’ebé mak halo ona hodi fortalese liután entre instituisaun rua ne’e ho forma atu dinamiza liután prosesu atuál ba kooperasaun no servisu sira ne’ebé hala’o ona, hodi respeita independénsia nia mandatu institusionál ida-idak ninian.

Notísia Relevante : PGR sei relata servisu ba Parlamentu Nasionál

Jornalista   : Nelson de Sousa

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here