Ministru Transporte Komunikasaun, José Agostinho da Silva. Imajen TATOLI/Egas Cristóvão

DILI, 31 marsu 2021 (TATOLI)–Ministru Transporte Komunikasaun (MTK), José Agostinho da Silva, hateten, nia parte sei bolu operadór telekomunikasaun hanesan Timor Telekom (TT) no Telemor atu justifika razaun relasiona ho rede internet lentu iha loron ikus ne’e.

Tuir governante ne’e, iha situasaun Estadu Emerjénsia no Serka Sanitária, funsionáriu no estudante sira halo serbisu no estuda iha uma, tanba ne’e presiza internet hodi komunika.

“Área telekomunikasaun sira tutela ba Ministériu Transporte Komunikasaun, tanba ne’e ami sei bolu operadór sira hodi husu kona-ba rede ne’ebé maka lentu. Ami sempre iha koordenasaun, liu-liu parte Autoridade Nasionál Komunikasaun (ANC, sigla portugés) sempre halo komunikasaun ho operadór sira atu nune’e iha períodu serka sanitária iha Dili bele fasilita estudante no ajente públiku sira bele halo serbisu iha uma,” Ministru José Agostinho informa iha resintu Parlamentu Nasionál, kuarta ne’e.

Notísia relevante: PN kestiona rede internet Timor Telecom-Telemor

Nia dehan, parte ministériu sei buka solusaun ba problema ne’e hodi hetan solusaun ho parte kompetente sira.

Tuir dadus 2019 hosi Seasia.co, Timor- Leste iha velosidade internet neineik liu daruak iha mundu no velosidade neineik liu dala-25 hosi velosidade média iha país Ázia no Pasífiku tomak.

Daudaun ne’e, banda internet internasionál ne’ebé maka Timor-Leste iha ho kapasidade 6 Gigabyte/segundu, ne’ebé fahe ba populasaun iha territóriu tomak ne’ebé asesu ba internet liuhosi operadór Timor-Telecom, Telkomcel no Telemor.

Governu liuhosi MTK aluga bandwith ho kapasidade 200 megabyte/segundu hodi fahe ba instituisaun Estadu sira hamutuk 140.

Aleinde ne’e, Governu iha ona planu atu atualiza kapasidade 200 megabyte/segundu ba 1 gigabyte/segundu, atubele ajuda bainhira seidauk iha rede fibra óptika.

Timor-Leste rasik uza hela ba satelite iha rede telekomunikasaun nasionál, maibé Governu iha ona planu iha tinan ne’e atu muda ba ligasaun kabu submarinu ne’ebé liga hosi Darwin mai Timor-Leste, nu’udar prioridade Governu ho kooperasaun Canberra, ho objetivu atu eleva kapasidade rede internet iha rai laran.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here