Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XII hosi Prezidente Repúblika, iha sala plenária PN, kuarta (31/03). Imajen TATOLI/Egas Cristóvão

DILI, 31 marsu 2021 (TATOLI)–Primeiru-Ministru (PM), Taur Matan Ruak, konsidera hahalok ema idaidak kombate COVID-19 sei garante salvaguarda moris rasik no ema seluk nia moris, tanba ne’e presiza esforsu hodi fila ba moris normál.

“Atu ita bele filafali ba moris normál sein rejistu mate, ha’u apela ba hotu-hotu, sein exesaun, atu kumpre medida prevensaun ne’ebé hala’o hela, atu nune’e kontribui evita propagasaun moras ne’e iha ita-nia país,” PM Taur relata iha ámbitu debate renovasaun Estadu Emerjénsia (EE) da-XII iha Parlamentu Nasionál (PN), kuarta ne’e.

Xefe Governu enkoraja entidade hotu atu halo esforsu no hahalok responsável ne’ebé adota ona iha tinan kotuk, nune’e bele rekupera prátika no komportamentu di’ak hodi evita ema mate tanba COVID-19 no propagasaun.

“Iha tinan kotuk (2020), Timor-Leste hetan rekoñesimentu hosi komunidade internasionál hanesan país ualu ne’ebé hetan susesu di’ak iha jestaun COVID-19, hanesan Nova Zelándia no país seluk. Maibé, rezultadu di’ak sira-ne’e agora iha hela prova ho evolusaun moras ne’e,” nia akresenta.

Maski nune’e, Governu kontinua halo buat hotu tuir kbiit, tantu iha nível nasionál no internasionál, hamutuk ho parseiru sira atubele asegura akompañamentu saúde timor-oan hotu nian.

“Iha asuntu ne’e, ha’u hakarak apela ba deputadu sira, atubele fó konfiansa ba Governu iha fulan hirak ikus ne’e, hodi autoriza renovasaun Estadu Emerjénsia ba da-XII hosi deklarasaun ida, nu’udar instrumentu fundamentál no insubstituível ne’ebé permite ba ita atu prevene no kombate moras ne’ebé iha poténsia boot ba mate,” nia subliña.

Xefe ezekutivu husu mós ba sidadaun hotu, tantu territóriu nasionál no rai-li’ur, tenke iha hanoin ida atu hamutuk luta hasoru COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here