Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 31 marsu 2021 (TATOLI)—Komisaun C ne’ebé trata asuntu Finansa Públika iha Parlamentu Nasionál husu ba Ministru Finansa atu halo justifikasaun ba Fundu COVID-19 ne’ebé aprova ba tinan fiskál 2021 ho montante millaun $31.

Notísia Relevante: Governu ezekuta ona fundu COVID-19 millaun $189

“Ha’u hakarak husu ba Ministru Finansa katak orsamentu orijinál ba COVID-19 ne’ebé Parlamentu Nasionál aprova iha 2021 hamutuk millaun $31, maibé alterasaun ba COVID-19 nian saldo iha COVID-19 iha 2021 sa’e ba millaun $68 ona, alterasaun ne’e mai hosi kategoria ne’ebé,” Prezidente Komisaun C, Deputada Maria Angélica Rangel, levanta liuhosi estensaun Estadu Emerjénsia ba dala-XXI, iha uma fukun, kuarta ne’e.  

Entretantu Membru Komisaun C, Deputada Maria Fernanda Lay, subskreve relatóriu ezekusaun tuir dekretu-lei kona-ba fundu COVID-19 katak periodikamente tenke hato’o mai Parlamentu Nasionál.

“Iha inísiu Estadu Emerjénsia ita hanoin tau situasaun piór no ami mós preokupa maibé iróniku mak Governu iha OJE 2021 tau de’it millaun $31 iha fundu COVID-19. Ami husu relatóriu antes orsamentu retifikativu tanba ami presiza halo análiza urjénsia ka lae,” Eis Prezidente Komisaun C ne’e hateten.

Deputada Bankada CNRT ne’e konsidera relatóriu ne’ebé Governu haruka ba uma fukun hamosu konfuzaun, tanba relatóriu nia konteúdu 2020 maibé tau fali fulan-agostu to’o dezembru 2021 nian.

“Ha’u lamenta maibé situasaun mak ne’e, ha’u espera katak Governu bele ejuda maibé ami presiza relatóriu finanseiru. Relatóriu finanseiru estensaun désimu dahuluk nian, hateten sei aprezenta relatóriu ho konpreensivu liu. Ami la hetan relatóriu ne’e to’o agora,” nia dehan.

Eis Prezidente Komisaun C ne’e hakarak haree konteúdu orsamentu retifikativu tanba millaun $123 kona-ba pakote rekuperasaun ekonómika ne’e ba tau iha fundu konsolidadu.

“Ami aviza tiha ona maibé lakohi rona. Ha’u hakarak haree retifikativu ba foti fali osan ne’e. Iróniku liu mak orsamentu kada programa maibé sei iha programa sein orsamentu. Ida-ne’e mak konfuzaun boot. UPMA (Unidade Planeamentu, Monitorizaun no Avaliasaun) nia papél iha-ne’ebé,” Membru Komisaun C ne’e preokupa.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here