Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XII hosi Prezidente Repúblika, iha sala plenária PN, kuarta (31/03). Imajen TATOLI/Egas Cristóvão

DILI, 31 marsu 2021 (TATOLI)—Primeiru-Ministru (PM), Taur Matan Ruak, hateten daudaun Governu kontinua aplika mekanizmu foun hanesan serka satária no konfinamentu domisiliáriu jerál obrigatóriu iha munisípiu balun ho ninia medida sira iha terrenu hodi hatán ba situasaun COVID-19, maski mudansa ne’e nafatin labele evita alastramentu vírus iha territóriu nasionál.

“Ho situasaun difisil ne’e, maski Governu hatán kedas ho medida ne’ebé foti ba konjuntura foun no modelada ba situasaun iha terrenu, hanesan impozisaun serka sanitária iha munisípiu Bobonaro, Covalima no Dili, maibé la posível atu evita alastramentu ne’e, tanba movimentu sira repete iha munisípiu Baucau no Viqueque, no daudaun ne’e ameasa transforma transmisaun lokál ba transmisaun komunitária,” PM Taur relata iha ámbitu debate renovasaun Estadu Emerjénsia (EE) da-XII iha Parlamentu Nasionál, kuarta ne’e.

Tuir Xefe Governu, kada nasaun hasoru ninia dezafiu rasik no iha kazu Timor-Leste, bazeia ba meiu, rekursu no infraestrutura ne’ebé disponível iha nasaun ne’e.

“Governu fó ona prioridade no atensaun espesiál ba kontrolu COVID-19 ne’ebé da’et hosi liña fronteira sira, tanba ne’e orijen prinsipál kazu sira ne’ebé infetadu. Durante besik fulan 10 halo vijilánsia, monitorizasaun, prevensaun no mitigasaun ba kazu importadu sira, ne’ebé Timor-Leste susesu ona durante misaun difisil ida-ne’e,” subliña PM.

Maski nune’e, nota katak hahú dezembru 2020, evolusaun COVID-19 muda ho lalais, no kontinua hasoru infesaun foun sira ne’ebé maka’as maibé Governu atua ho aprovasaun ba medida rigoroza no ezijente sira durante períodu EE dala ikus nian.

“Infelizmente, la posível atu evita situasaun ne’ebé a’at ne’e, hahú lokaliza iha postu fronteriza Fatumean nian no hada’et ba beibeik ba zona seluk país nian, ho destake ba situasaun grave liu ne’ebé daudaun ne’e ita hasoru iha munisípiu Díli, ne’ebé rejista foku ativu 52 transmisaun lokál,” nia akresenta.

Xefe ezekutivu dehan, medida sira opta ba prevensaun no mitigasaun COVID-19 nian, estabelese ona iha komunidade internasionál, hanesan restrisaun ba viajen sira no ba konfinamentu.

“Ita sei implementa hodi hamenus propagasaun COVID-19, hodi fó tempu ba vasina ne’ebé mak administra ona iha país sira seluk no bele to’o lalais mai Timor-Leste hodi fó imunizasaun ba populasaun timor-oan tomak,” nia hatutan.

Daudaun ne’e, kazu rejistadu iha Timor-Leste hahú marsu 2020 hamutuk 563, kazu ativu 382 ne’ebé daudaun iha sala izolamentu, rekuperadu 185, no seidauk iha mak mate.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here