Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XII hosi Prezidente Repúblika, iha sala plenária PN, kuarta (31/03). Imajen TATOLI/Egas Cristóvão

DILI, 31 marsu 2021 (TATOLI)-Governu liuhosi Primeiru Ministru, Taur Matan Ruak, hateten VIII Governu Konstituisionál esforsu ho medida hodi responde ba situasaun ekonómika efeitu COVID-19.

“Ita tenke toma responsablidade responde situasaun ekonómika efeitu hosi estensaun Estadu Emérjensia, liuliu evolusaun kazu pozitivu COVID-19 durante fulan hirak ne’e.  Ita-nia orsamentu Jerál Estadu 2021 foku liu ba rekuperasaun ekonómika tanba ita hanoin katak situasuan ne’e sei permanese iha marsu to’o novembru tinan kotuk, maibé infelizmente dezembru tinan kotuk kazu aumenta,” PM Taur hateten hafoin debate estensaun Estadu Emerjénsia iha sala plenária, Parlamentu Nasionál (PN), kuarta ne’e.

Atu responde situasaun ne’e, PM Taur dehan, Governu haruka ona orsamentu retivikativu ho montante millaun $200-resin mai PN atu halo ajenda no halo diskusaun no aporvasaun.

Notísia relevante: Governu aprezenta Orsamentu Retifikativu millaun $223 ba PN

Governu mós kontinua halo esforsu atu responde preokupasaun sidadaun iha situasaun pandemia globál, tuir kapasidade Estadu no Govenru atu tau matan ba sidadauns sira ne’ebé la’ós hotu maibé ba sira ne’ebé mais vulnerável liu.

Kona-ba apoiu umanitáriu ba estudante sira, tuir Xefe Governu, liuhosi liña ministeriál mobiliza no fahe daudaun foos kilograma 25 kuaze saka 40.000 (tonelada 1.000).

“Ita espera katak la’ós ba de’it ita-nia estudante sira, maibé ba populasuan sira ne’ebé presiza. Klaru katak ita la ajuda dala-ida de’it,  maibé ita bele fó medida posível hodi kontinua tau atensaun nafatin ba sira iha momentu difisil hanesan ne’e,” nia akresenta.

Aleinde ne’e, tempu badak Governu liuhosi Ministériu Saúde hamutuk ho komisaun interministeriál sei aprezenta informasaun kona-ba planu vasinasaun nasionál ba PN.

“Ha’u hakarak klarifika katak daudaun ne’e ita adere sistema COVAX hodi asesu ba vasina AstraZenaca, ne’ebé iha demora lubuk ida maibé se buat hotu di’ak pelumenus fulan-oin (abríl) ita simu uluk balun hosi 20% ne’ebé sistema COVAX  fó ba Timor-Leste,” PM Taur hatutan.

Aleinde ne’e, daudaun Timor-Leste prepara-an ba asesu vasina 80%, liuhosi halo kontaktu ho entidade relevante hodi kompleta nesesidade iha rai laran.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here