Enkontru entre Ministru Prezidénsia Konsellu Ministru, Fidelis Manuel Leite Magalhães no Embaixadór EUA iha Timor-Leste, Charles Kevin Blackstone, iha Gabinete PCM, Palásiu Governu, tersa (30/03). Imajen/PCM

DILI, 31 marsu 2021 (TATOLI)–Ministru Prezidénsia Konsellu Ministru, Fidelis Manuel Leite Magalhães reuniaun ofisiál ho Embaixadór Estadu Unidu Amérika (EUA) iha Timor-Leste, Charles Kevin Blackstone, hodi hatudu kompromisu kontinua hametin kooperasaun bilaterál  entre Estadu rua, iha ámbitu dezenvolvimentu Timor-Leste.

Durante enkontru, parte rua aborda asuntu oin-oin liga ba kooperasaun bilaterál hanesan prioridade nasionál iha situasaun epidemiolójika kauza hosi COVID-19.

“Relasaun liuhosi kooperasaun entre país rua ne’e, fundamenta ba partilla valór komun ne’ebé Estadu Unidu Amérika kontinua hametin relasaun no traballu konjunta ho  Governu Timor-Leste  ba dezenvolvimentu país,” refere nota ne’ebé Agência TATOLI, asesu kuarta ne’e.

Enkontru ne’e ba dahuluk hafoin Diplomata ne’e entrega karta kredisensiál ba Prezidente Repúblika Francisco Guterres ‘Lú Olo’ iha 19 marsu.

Notísia relevante: Prezidente Repúblika simu karta kredensiál hosi nasaun rua

Iha ámbitu reniaun ne’e, koa’lia mós programa Millennium Challenge Corporation (MCC), lideradu hosi Ministru Fidelis Magalhães dezde 2018, ne’ebé asina ona akordu finansiamentu ne’ebé inisál kria ekipa responsável ida hodi halo identifikasaun setór ekonómiku atu dezenvolve  durante implementasaun  programa.

Programa MCC ne’e ho valór kuaze millaun $285 ne’ebé atu implementa ba períodu tinan lima, ho foku  iha área edukasaun no água no saneamento.

Daudaun ne’e, programa ne’e iha estudu preparativu no levantamentu dadus, nesesáriu atu determina nune’e realiza akordu implementasaun, ne’ebé sei asina iha tinan ne’e (2021).

Alende ne’e, durante enkontru ko’alia mós programa kooperasaun foun ho United States Agency for International Development (USAID), ne’ebé prevee osan ho montante millaun $93 ba tinan lima oin mai.

Notísia relevante: Embaixadór EUA anunsia programa foun USAID ho montante millaun $93

Programa ne’e preparadu ho baze prioridade Governu no foku  ba diversifisaun ekonomia naun petrolífera.

Ministru Fidelis no Diplomata amerikanu ne’e ko’alia mós kona-ba andamentu projetu reabilitasaun aeródromo iha Baucau, ne’ebé EUA reitera katak laiha kualker intervensaun no interese iha futuru.

Nune’e, Governu Timor-Leste iha vontande atu avansa ho projetu ne’ebé sei diskute detallmente Vise-Primeiru-Ministru no Ministru Planu Ordenamentu, José Maria dos Reis, ho Embaixadór EUA.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here