Jestór Programa JSMP, Casmiro dos Santos. Imajen/JSMP

DILI, 31 marsu 2021 (TATOLI) – Jestór Programa hosi Programa Monitorizasaun Sistema Judisiál (JSMP-sigla Inglés), Casimiro dos Santos, husu Estadu ka Governu atu estabelese akordu estradisaun ho nasaun sira seluk hodi fasilita servisu judisiál nian bainhira suspeitu ka arguidu sira sees hosi territóriu Timor-Leste.

Notísia Relevante : Justisa hasoru Kalbuadi, PGR haktuir TDD ho TR dehan laiha lei kapturasaun internasionál

“Dalan úniku mak tenke iha duni akordu estradisaun, liu-liu nasaun sira ne’ebé ita konsidera sai hanesan fatin ka zona ba iha arguidu sira atu haksumik aan hosi akuzasaun sira perante prosesu judisiál iha Timor-Leste,” Casimiro dos Santos hateten hodi responde Agência Tatoli iha nia kna’ar fatin, Colmera, Dili, kuarta (31/03).

Nia hateten, mezmu daudaun Timor-Leste seidauk iha akordu estradisaun, maibé bele liu hosi esforsu dalan diplomasia ne’ebé ho vontade di’ak hosi Estadu, oinsá halo aproximasaun hodi lori fila-fali sidadaun sira ne’ebé sees hosi prosesu judisiál.

Tuir nia haree katak maneira mak haruka ekipa informal hodi halo identifikasaun hafoin halo karta pedidu haruka ba nasaun sira ne’ebé identifikadu maske laiha akordu estradisaun, maibé haree ba iha nasaun sira bainhira iha mutual benefit bele fasilita.

“Ita haree ezemplu Indonézia ho Singapura, mezmu laiha akordu estradisaun maibé ho de’it maneira diplomasia konsege lori fila-fali sidadaun sira ne’ebé hetan kondenasaun hosi prosesu judisiál Indonézia nian,” Casimiro dos Santos hateten, hodi dehan tan loloos Estadu Timor-Leste liuhosi parte kompetente durante ne’e presiza ho dalan diplomasia ne’e, maibé la konsege nune’e labele hatene paradeiru suspeitu ka arguidu sira ne’ebé sees hosi prosesu justisa iha Timor-Leste.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here