Izolamentu Vera Crus. Imajen Tatoli/Egas Cristóvão.

DILI, 31 marsu 2021 (TATOLI)—Sala Situação Centro Integrado Gestão de Crise (SS-CIGC), anunsia katak, Timor-Leste (TL) hahú rejista pasiente pozitivu COVID-19 na’in ida, ne’ebé sintomátiku grave, no lori ona ba sala izolamentu Vera Crus hodi hetan asisténsia médika.

“Hahú ohin madrugada, fatin izolamentu Vera Crus simu tan kazu detetadu ida, sintomátiku, grave,” Koordenadór Forsa-Tarefa ba Prevensaun no Mitigasaun, Rui Maria de Araújo fó-sai asuntu ne’e, liu hosi konferénsia imprensa, iha Centro Convenções Dili (CCD), kuarta ne’e.

Notísia relevante:COVID-19: kazu foun iha Dili 41, ativu 415

Rui Maria de Araújo esplika, kazu ne’e, señora ho idade 69, ne’ebé iha istória diabetes ho obesidade.

Pasiente ne’e hahú isin-manas no iis-bo’ot semana ida ona no oras ne’e daudaun halo hela tratamentu ba infesaun seluk ne’ebé mós afeta ba ninia pulmaun.

“Pasiente ne’e uza hela high flow oxygen,” Médiku ne’e subliña.

Iha mós kazu detetadu na’in-tolu sintomátiku moderadu, ne’ebé mós oras ne’e iha fatin izolamentu Vera Crus, maibé doutór Rui Araújo dehan, sira-nia kondisaun estável.

Ohin, SS-CIGC rejista kazu pozitivu foun COVID-19 na’in 41, ne’ebé detetadu iha munisípiu Dili, iha mós kazu rekoperadu na’in-ualu no númeru pasiente atuál 415.

Notísia relevante:COVID-19: sasin hosi pasiente rekoperadu

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here