Membru Mama Bolu rega dezinfektan ba anin leten. Imajen/Facebook: Mama Bolu.

DILI, 31 marsu 2021 (TATOLI)—Pontu fokál hosi Organizasun naun Governamentál Knua Haberan Komunidade (KHC) iha Munisípiu Viqueque, Agusto Pinto, informa rezultadu monitorizasaun kona-ba serka sanitária no konfinamentu obrigatóriu ne’ebé aplika iha Munisípiu Viqueque, nota katak ekipa vijilánsia iha Pontu Entrada Asalaitula kontroladu.

Agusto Pinto hatutan, bainhira   Konsellu Ministru foti dezisaun munisípiu Dili, Baucau no Viqueque aplika serka sanitária, ekipa saúde, PNTL no Autoridade lokál sira iha Postu Administrativu Ossú, Munisípiu Viqueque mós deside harii postu vijilánsia ida iha área Asalaitula hodi limita movimentasaun hosi munisípiu ida ba munisípiu seluk.

“Ami hakarak relata rezultadu monitorizasaun ba publiku bazea ba serka sanitária no kofinamentu obrigatóriu iha Munisípiu Viqueque, ami nota katak situasaun kontroladu tanba ekipa vijilánsia ne’ebé servisu iha pontu entrada Asalaitula servisu kumpre regra,” Agusto Pinto informa liuhosi konferénsia imprensa ne’ebé Agência TATOLI asesu, kuarta ne’e.

Durante sira-nia monitorizasaun, nia dehan, akompaña situasaun serka sanitária nian kontroladu tanba pasajeiru sira-ne’ebé hakarak atu halo viajen ba munisípiu seluk tenke presiza iha karta autorizasaun, mak foin seguransa bele autoriza hodi vhalo iajen sai no tama.

“Abitante sira ne’ebé hakarak halo viajen ba mai laiha karta autorizasaun ekipa vijilánsia haruka sira fila-fali ba nia fatin tanba laiha karta autorizasaun ka guia de marca,” nia dehan.

Nune’e mós, nia dehan, pesoál saúde sira iha pontu entrada Asalaitula, halo dezinfetan loro-loron ba transporte no pesoál sira-ne’ebé iha karta autorizasaun ka guia de marca, molok atu viajem ba fatin seluk.

“Ekipa vijilánsia kontrola transporte sira-ne’ebé halo tranzasaun iha pontu entrada Asalaitula no dezinfetan mós sasán sira tama iha Munisípiu Viqueque,” nia hateten.

Aleinde ne’e, tuir nia, hosi parte seguransa liuliu membru Polísia Nasionál Timor-Leste Munisípiu Viqueque nian halo kontrolu makaas ba komunidade ne’ebé hakarak halo movimentasaun liuhosi dalan illegál.

Nia argumenta, durante halo motorizasaun iha Viqueque nota takak dezafiu ne’ebé ekipa vijilánsia hasoru iha terrenu, ekipa vijilansia uza de’it komunidade nia uma no fatin deskansa mós laiha.

“Ita haree ekipa vijilánsia sira fatin deskansa, tau ekipamentu servisu saúde laiha, nune’e iha mós difikuldade ba nesesidade bazika liuliu hahan loro-loron nian,” nia haktuir.

Nia hateten, ekipa vijilánsia hetan ona lona rua ne’ebé aopoi hosi Cruz Vermelha Timor-Leste (CVTL) maibé seidauk sufisiente tanba bainhira udan akompaña ho anin boot ne’e labele utiliza.

Entretantu, hosi observasaun ekipa KHC iha Munisípiu Viqueque haree katak iha lideransa komunitáriu sira hosi Postu Administrativu Ossu mós husu ba parte saúde, antes atu halo teste swab ka implementa progarama vasinasaun COVID-19 ba komunidade, parte saúde sira tenke tun ba terrenu atu sensibiliza no fó informasaun ne’ebé di’ak no kredivel ba abitante sira.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here