Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 31 marsu 2021 (TATOLI)—Bankada Partidu Demokrátiku (PD) husu VIII Governu Konstitusionál atu foka mós ba dezenvolvimentu iha rai-laran tanba Orsamentu Jerál Estadu (OJE) ho montante biliaun $1.895 aprovadu no promulgadu.

Xefe Bankada PD, Deputadu António da Conceição, hatene klaru katak Governu labele halo buat hotu maibé mós lamenta se Governu dehan labele halo buat ida tanba hasoru COVID-19, maibé ida-ne’e sai oportunidade atu Governu bele foka ba dezenvolvimentu ekonomia rai laran nian.

“Loos tebes katak di’akliu salva povu hosi moras, no ida-ne’e preokupasaun ida-ne’ebé hatudu responsabilidade ukun nian. Maibé mós ladún furak bainhira pandemia sai oportunidade atu Governu labele liu hala’o dezenvolvimentu ekonomia rai laran nian,” Xefe Bankada PD ne’e levanta liuhosi estensaun Estadu Emerjénsia ba dala-XII, iha Parlamentu Nasionál, kuarta ne’e.

Nia prova katak COVID-19 ne’e realidade maibé dezenvolvimentu tenke la’o no bele haree referénsia iha Indonézia nian ne’ebé COVID-19 lori duni vida barak maibé dezenvolvimentu sira la hapara.

Nune’e mós, nia dehan, iha Estadu Unida Amérika (EUA), Prezidente Jo Biden buka promove polítika nu’udar konsensu atu hamosu fundu ba edukasaun, ba infraestrutura, ba telekomonukasaun no ba setór indústria atu rekupera sira-nia ekonomia.

“Ita Timor-Leste iha OJE ne’ebé arovadu no promulgadu. OJE nia objetivu mak atu nafatin alerta ba COVID-19, maibé mós tenke hala’o dezenvolvimentu rekuperasaun ekonómika,” nia dehan.

Nune’e, PD hanoin COVID-19 labele sai oportunidade atu ignora programa polítika ne’ebé aprovadu iha inísiu governasaun, labele sai meiu atu halo pasivu governante sira no labele mós sai razaun atu líder sira fahe-malu.

“Nasaun husu ita hotu nia hamutuk. Hamutuk iha razaun no la’ós hamutuk nu’udar koru atu hananu refraun múzika ida. Diferensa iha opiniaun no mak demokasia maibé hamutuk ba interese povu nian mak sentidu Estadu,” Xefe Bankada PD ne’e hateten.

Tanba ne’e, Bankada PD husu atu reativa hikas kna’ar setór privadu nasionál nian iha obra emerjénsia tanba nasaun nia dezenvolvimentu paradu besik tinan haat (4) ona.

Bankada Opozisaun ne’e mós husu atu Governu liberta setór privadu no sidadaun sira-ne’ebé hetan penalti ho kréditu ne’ebé aperta sira-nia kakorok no hasusar moris família nian.

Xefe Bankada PD ne’e husu atu atividade kooperativa produsaun iha setór agríkola no setór ekonómika sai prioridade iha ezekusaun OJE 2021 nian.

“Ami mós husu atu Governu kompleta tiha aktividade Cesta Bazica iha fatin balun ne’ebé ladauk simu, hanesan iha aldeia São Jose,” nia fó hanoin ba Governu.

Entretantu Orsamentu Jerál Estadu (OJE) 2021 ne’ebé Parlamentu Nasionál aprova no Prezidente Repúblika promulga hamutuk biliaun $1.895 kompostu hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Hosi montante orsamentu biliaun $1.895 ne’e iha trimestre dahuluk (janeiru, marsu abríl) ho persentajen ezekuasaun atinje $20.6%.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here