Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XII hosi Prezidente Repúblika, iha sala plenária PN, kuarta (31/03). Imajen TATOLI/Egas Cristóvão

DILI, 31 marsu 2021 (TATOLI)—Haree ba evolusaun kazu ativu COVID-19 ne’ebé aumenta kada loron iha munisípiu Dili, maka Governu aprova ona Projetu Dekretu Governu ba alterasaun dahuluk Dekretu Governu númeru 6/2021 loron marsu, hodi autoriza izolamentu terapéutiku iha uma (auto izolamentu) tuir despaisu fundamentu hosi Ministériu Saúde (MS).

Tuir Primeiru Ministru (PM), Taur Matan Ruak, aprovasaun ne’e atubele redús intensidade vírus iha tempu mai oin hafoin tama ona faze datoluk ‘transmisaun komunitária’, maski daudaun iha hela faze dahuluk importasaun no transmisaun lokál.

“Auto izolomentu la’ós halo ba ema bo’ot balun de’it, ne’e laiha, tanba ami-nia previzaun kuandu tama iha faze transmisaun komunitária, mak ita sei laiha kapasidade atu simu tan, entaun dalan ida mak ita ida-idak hela iha uma no ekipa saúde mak ba tau matan ba ita. Ida-ne’e akontese ba nasaun seluk mós,” PM Taur relata iha ámbitu debate renovasaun Estadu Emerjénsia (EE) ba da-XII, iha sala plenária, Parlamentu Nasionál, kuarta ne’e.

Notísia relevante: Medida EE da-XII, kuarentena bele iha uma ho despaisu MS

Xefe Governu hato’o kestaun ne’e hodi rejeita deklarasaun Deputada Bankada CNRT, Carmelita Caetano Moniz no públiku katak Governu altera Dekretu-lei ne’e tanba iha líder partidu polítiku balun pozitivu COVID-19, maibé izola iha uma rasik.

“Signifika pesoál saúde sira bele simu de’it sira ne’ebé grave ona atu halo tratamentu saúde. Ita inisalmente prepara fatin izolamentu kuaze 50, maibé ho ohin númeru aumenta boot tanba uluk númeru kuarantena mak boot maibé agora ne’e númeru izolamentu mak boot,” nia akresenta.

Nia subliña, Estadu Timor-Leste liuhosi Governu iha prinsípiu ida dehan katak hein buat di’ak, maibé prepara mós ba buat a’at, ne’ebé medida balun avansa daudaun atu abitua sidadaun sira.

Aprovasaun alterasaun dahuluk ne’e, hafoin halo análize aprezetasaun Koordenadór Sala Situasaun, Sentru Integradu Jestaun Krize (CIGC) kona-ba pontu situasaun epidemiolójika nasionál.

Nune’e, iha posibilidade kumpre izolamentu iha uma, maibé despeza saúde no rezidénsia iha izolamentu privadu hosi individu ida-idak.

To’o loron 30 marsu ne’e, Timor-Leste rejista ona kazu pozitivu COVID-19 hamutuk 563, kazu ativu no baixa iha izolamentu 382, rekuperadu 181, no seidauk rejista mate.

Enkuantu, iha nível mundiál, tuir dadus hosi worldometers, iha loron 31 marsu 2021 kazu pozitivu atinje ona 128.788.958, mate 2.815.035 no ne’ebé rekuperadu millaun 103.916.332.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here