Aserbispu Arkidioseze Metropolitana Dili, Don Virgílio do Carmo da Silva. Imajen Tatoli/António Gonçalves.

DILI, 30 marsu 2021 (TATOLI)—Arsebispu Arkidioseze Metropolitana Dili, Don Virgílio do Carmo da Silva, lori Uma Kreda katólika Timor-Leste nia naran hato’o sentidu solidaridade ba sarani Katólika iha Makassar ne’ebé foin lalais akontese bomba suisida (Bom bunuh diri) iha portaun Igreja Katedral Makassar nia oin.

“Nu’udár ema sarani no ita-nia Uma Kreda mós hola parte iha organizasaun Federasaun Bispu Ásia ninian, iha situasuan ida ne’e lori ita uma kreda nia naran hato’o nafatin sentidu solidaridade ba ita-nia maluk sarani katólika iha Makassar no Aarsebispu Makassar ninian ba situasuan ne’ebé sira enfrenta,” Don Virgílio do Carmo da Silva hateten ba jornalista sira hafoin fó mensajen paskua nian ba sarani sira, iha Câmara Eclesiástica Lecidere, Dili tersa ne’e.

Ulun boot ba Uma kreda lokál ne’e hateten, maske iha akontesimentu ne’e la rezulta vítima barak maibé ida-ne’e mós sai hanesan ameasa boot ida ba maluk sarani katólika sira iha Makassar-Sulawesi Selatan-Indonézia liuliu iha tempu forte semana santa ida-ne’e.

“Grasa maromak nian hanesan ita hotu hatene katak iha akontesimentu ne’e vítima labarak, maibé ida ne’e ameasa boot ida ba sira liuliu iha tempu forte semana santa ida-ne’e. Tanba buat sira-ne’e la’os foin akontese iha Indonézia maibé iha tinan rua liubá mós akontese iha nasaun Srilanka ne’ebé mós iha tempu paskua ninian,” nia dehan.

Tanba ne’e, nia husu sarani sira iha Timor laran tomak, iha tempu semana santa ida-ne’e reza ba sarani maluk nasaun sira-ne’ebé kontinua hetan presegisaun makaas.

“Ita iha Timor ne’ebé ladun hetan situasuan sira hanesan ne’e, entaun fó oportunidade mai ita atu hanoin, reza ba ita-nia maluk iha nasaun sira ne’ebé hetan presegisaun makaas. Ita reza, nune’e sira-nia fiar mós bele forte hodi hasoru situasaun saida de’it mak sira hasoru. Tanba orasaun nu’udár kontribuisaun sarani nian bele solidáriu ba maluk sira-ne’ebé hetan difikuldade oioin iha situasaun defisil liga ho fiar sarani nian,” nia dehan.

Iha Domingo Ramos (28 marsu 2021), maizumenus tuku 10.30 dadersan, suspeitu na’in-rua (2) lori motor matic ho númeru polísia DT 5984 MD, tenta atu tama ba iha área Igreja Katedral Makassar ne’ebé lokaliza iha Jalan Kajolalidi, Makassar, to’o ikus akontese bomba suicida ne’ebé suspeitu na’in-rua mate.  

Hosi akontesimentu bomba suicida ne’e, la rezulta sarani sira mate maibé seguransa igreja nian hamutuk na’in-14 no sarani sira lubuk ida mak hetan kanek. Tuir informasaun atuál, akontesimentu ne’e rezulta sarani sira hamutuk na’in-20 mak hetan kanek.

Jornalista: Arminda Fonseca

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here