Estudante Fakuldade Siénsia Sosiál (FSS) hosi Universidade Nasionál Timor Lorosa’e (UNTL) hala’o konferénsia imprensa iha kampus Sentrál, Caicoli (30/03/21). Imajen Tatoli/Tomé Amado.

DILI, 30 marsu 2021 (TATOLI)—Estudante Fakuldade Siénsia Sosiál (FSS) hosi Universidade Nasionál Timor Lorosa’e (UNTL), husu Governu atu kria kondisaun ba estudante, traballadór no vendedór-sira, bainhira estende serka sanitária no konfinamentu obrigatóriu iha munisípiu Dili, Baucau no Viqueque.

Estudante UNTL husu ne’e, tanba tuir observasaun ba implementasaun serka sanitária ne’ebé liu ona, estudante, traballadór no vendedór-sira sai vítima.

Notísia relevante:Aban, PN debate renovasaun Estadu Emerjénsia ba dala-XII

“Ami konsidera desizaun hodi estende Estadu Emerjénsia ho maneira serka sanitária iha Munisípiu Dili, Baucau no Viqueque laiha avaliasaun. Tanba ami estudante, traballadór no vendedór-sira sai vítima ba desizaun ne’e,” Portavóz estudante FSS, Zebedeu Monteiro Pinto hateten ba jornalista-sira liu hosi konferénsia imprensa iha kampus sentrál UNTL, Caicoli, tersa ne’e.

Portavóz estudante FSS ne’e sujere ba Governu atu halo avaliasaun ba kazu públiku tanba atividade diária paralizadu hanesan estudante labele tuir prosesu aprendizazen, traballadór-sira labele serbisu tanba ajénsia no empreza barak mak taka, inklui vendedór-sira labele lori sira-nia produtu ba merkadu.

Hosi realidade ne’e, maka estudante UNTL sujere ba Sekretáriu Estadu Komunikasaun Sosiál (SEKOMS) atu kria kondisaun hanesan estabelese kooperasaun ho operadór Timor Telecom, Telemor no Telcomsel atu bele oferese liña internete gratuita ba estudante-sira, durante serka sanitária.

Sujere mós ba Ministru Ensinu Superiór Siénsia no Kultura (MESSK) atu reativa hikas prosesu aprendizazen ho maneira semana sim no semana não, nune’e universitáriu-sira labele abandonadu.

Governu mós presija buka mekanizmu di’ak atu kria kondisaun ba vendedór-sira, liuliu sira ne’ebé hosi Distritu ne’ebé baibain hetan rendimentu hosi Dili, atu bele transporta sira-nia produtu mai kapitál, atu bele sustenta família.

Entretantu, iha 29 marsu 2021 Konsellu Ministru (KM) aprova Projetu Rezolusaun Governu, ba renovasaun impozisaun serka sanitária no konfinamentu domisiliáriu jerál ba populasaun iha munisípiu Baucau no Viqueque to’o tuku 23:59 loron 02 abríl 2021.

Ho renovasaun ne’e, kontinua bandu sirkulasaun ema entre munisípiu rua ne’e ho munisípiu seluk, esetu iha kazu fundamentu forte tanba razaun seguransa públika, saúde públika, asisténsia umanitária, manutensaun sistema abastesimentu públiku ka ba realizasaun interese públiku.

Tuir planu, aban (30/03) Parlamentu Nasionál (PN), sei debate kona-bá pedidu autorizasaun hosi Prezidente Repúblika (PR), Francisco Guterres ‘Lú Olo’, hodi halo renovasaun ba Estadu Emerjénsia (EE) ba dala-XII iha territóriu tomak.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here