Eis Prezidente Republika, José Manuel Ramos Horta. Imajen/Antonio Goncalves.

DILI, 30 marsu 2021 (TATOLI)—Laureadu Prémiu Nobel da Paz, José Manuel Ramos Horta, hateten Timor-Leste presiza simu vasinasaun ba COVID-19 nian tanba liuhosi vasina mak bele aumenta ema-nia imunidade.

“Imunidade bele maihosi vasina, imunidade bele maihosi ita-nia organizmu rasik. Ne’eduni, ha’u ko’alia ho prezidente nu’udar Xefe Estadu hatudu nia perfurasaun,” Ramos Horta hateten ba jornalista sira, hafoin hala’o enkontru ho Prezidente Repúblika, Francisco Guterres Lú Olo, hodi hato’o nia opiniaun kona-ba problema Myanmar inklui asuntu COVID-19 nian, iha Palásiu Prezidénsia Nicolau Lobato, Bairru Píte, Dili, Bairru Píte, tersa ne’e.

Eis Prezidente Repúblika ne’e hatutan, prevensaun ba moras COVID-19 ne’e importante no labele iha konsekuensia ba ema-nia vida, tanba ne’e mak Governu halo esforsu para dada vasina mai Timor-Leste liuhosi programa Ministériu Saúde nian hodi aumenta ema-nia imunidade.

“Vasina ba front line sira, ita hein vasina barak liu sei mai para imuniza ita-nia populasaun tomak. La presiza 100% maibé pelumenus ita vasina 80% ne’e, signifika hetan ona imunidade ba sosiedade tomak. Tanba, vasina vírus la konsegue multiplika, se 80% populasaun hetan imunidade,” nia hateten.

Ho kazu pozitivu COVID-19 ne’ebé aumenta beibeik, nia dehan, imposível 100% Governu halo kontrolu ho di’ak tanba rai sira-ne’ebé efisiente liu Timor-Leste no nia ekipamentu oioin maibé la konsege. Sorte tinan ida resin ona, maibé iha Timor-Leste seidauk ema ida mak mate tan COVID-19 ne’e tanba Governu esforsu makaas.

Iha situasaun serka sanitaria ne’e nia laran, diplomata ne’e hateten, nu’udar eis Prezidente Repúblika no sidadaun ida, nia parte kontinua halo kampaña prevensaun nian ba populasaun sira, hodi apresia ba Governu nia intervensaun ba COVID-19 ne’e.

“Ho prevensaun mak ita evita COVID-19 ne’ebe mak sai pandemia boot iha Timor-Leste. Sorte Governu nia intervensun iha marsu tinan kotuk liubá to’o agora laiha ema ida mate tanba COVID-19. Se Governu, tinan kotuk hamutuk ho Prezidente Repúblika, Parlamentu Nasionál, hamutuk ho líder nasionál hanesan Maun Boot Xanana la interven karik, iha tempu hanesan ne’e ema mate barak ona,” nia hateten.

Aleinde ida-ne’e, Ramos Horta informa, iha enkontru ne’e Prezidente Repúblika Francisco Guterres Lú Olo mós husu atu hato’o hela nia opiniaun kona-ba problema internasionál balun liuliu problema kona-ba Myanmar nian, ne’ebé halo rejiaun Ázia preokupa no nakdoko.

“Tanba Prezidente Repúblika hatene, problema Myanmar ha’u koñese di’ak. Tanba, ha’u rasik mak uluk dezenvolve relasaun movimentu demokrásia, nu’udar eis Prezidente Repúblika no dala barak sempre iha kontaktu direta hodi fó ha’u-nia opiniaun ba lider importante sira iha Myanmar,” nia dehan.

Ramos Horta hala’o vizita ba Myanmar bainhira iha sétimo Governu, nia kaer kargu nu’udar Ministru Estadu, Konselleiru Seguransa Nasionál, bainhira golpe militár kondenadu hosi Indonézia rasik no Malázia—rai rua ne’e demokrásia iha Sudeste Aziatiku entaun agora daudaun buat ne’ebé mak akontese iha Myanmar, Timor-Leste labele nonook nu’udar Esatdu no Governu.

“Ida-ne’e mak Prezidente nia preokupasaun hodi konvida ha’u atu fó opiniaun,” Ramos Horta dehan.

Jornalista:  Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here