Estudante sira hosi Sentru Direitu Ema-nian, UNTL. Imajen mídia UNTL

DILI, 30 marsu 2021 (TATOLI)—Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten MSSI seidauk simu lista adisionál estudante Universidade Nasionál Timor Lorosa’e (UNTL) nian hosi Ministériu Ensinu Superiór Siénsia no Kultura (MESSK) atu halo intervensaun umanitária hodi fó apoiu foos ba estudante sira.

Notísia Relevante: Estudante UNTL 4.906 hela kost seidauk simu foos

“Ami seidauk simu lista adisionál hosi estudante UNTL nian. Maibé, orsida hosi Ensinu Superiór Siénsia no kultura (MESSK) verifika tiha dadus sira-ne’e mak depois enkamiña mai MSSI mak ami haree. Maibé, to’o agora lista adisionál estudante UNTL nian ne’e MSSI seidauk simu,” Rui Manuel Gago Exposto informa ba Agência TATOLI, liuhosi telefónika, tersa ne’e.

Bainhira Ministériu Ensinu Superiór Siénsia no Kultura (MESSK) hatama ona lista adisionál, nia dehan, parte MSSI konsidera no sei halo intervensaun umanitária hodi fó apoiu ba estudante sira maibé sei liuhosi verifikasaun.

Nia informa, estudante hosi UNTL ne’e Fakuldade Siénsia Ezata (FCE) hamutuk na’in-30 mak simu ona apoiu umanitária hosi Ministériu Solidariedade Sosiál no Inkluzaun (MSSI) iha semana kotuk ne’e.

“Lista ne’ebé tama iha MSSI ne’e maihusi fakuldade ida ho ema na’in 30. Ida-ne’e mak ita fó tiha ona atendimentu semana kotuk ne’e. Ha’u rona dehan iha lista adisionál maibé sira seidauk haruka mai ka seidauk hatene lista adisionál né iha ema na’in hira. Ha’u seidauk hetan informasaun hosi MESSK kona-ba estudante UNTL ne’ebé mak sei iha lista adisionál hodi hetan apoiu foos,” nia hatutan.

Aleinde ida-ne’e fó apoiu foos ba estudante sira hela iha kost, nia esplika, Governu liuhosi Minsitériu Solidariedade Sosiál no Inkluzaun (MSSI) mós halo intervensaun umanitária n ba ema kbiit laek sira-ne’ebé mai direta iha edifísiu MSS nian iha Caicoli hamutuk ho estudante sira-ne’e simu dala ida.

“Ita halo ona atendementu ba ema kbiit laek iha xefe família purvolta 5.755 no estudante 5.587,” nia informa.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here