Lansamentu INFF via online. Imajen/MF

DILI, 30 marsu 2021 (TATOLI)-Ministériu Finansa (MF) hamutuk ho parseiru dezenvolvimentu hanesan Uniaun Europeia (UE) no Organizasaun Nasaun Unida (ONU) lansa virtuál kuadru foun hanaran ‘Kuadru Finansiamentu Nasionál Integradu (INFF, sigla Inglés)’, hodi mobiliza rekursu finanseiru atu alkansa Objetivu Dezenvolvimentu Sustentável (ODS).

Inisiativa ne’e lidera hosi Governu liuhosi MF, hanesan kuadru finansiamentu prioridade dezenvolvimentu sustentável nasionál, ne’ebé define ona iha Planu Estratéjiku Dezenvolvimentu Nasionál 2011-2030 (PEDN) no ODS.

Ministru Finansa, Rui Augusto Gomes, konsidera INFF hanesan instrumentu ba fonte finansiamentu no investimentu alternativa atu dezenvolve ekonomia diversifikadu, inkluzivu, sustentável no reziliente ba timor-oan nia moris di’ak.

“Instrumentu ne’e sei orienta no ajuda Governu atu define polítika kona-ba jestaun finansa públika, ho objetivu iha prosesu planeamentu no orsamentu integradu ne’ebé di’ak,” hateten Ministru Rui Augusto Gomes, hanesan haktuir iha nota konjunta ne’ebé Agência TATOLI asesu, tersa ne’e.

Tuir governante ne’e, situasaun COVID-19 iha mundu no Timor-Leste lori impaktu sosio-ekonómiku, tanba ne’e plataforma integradu ne’e bele ajuda Governu.

Nune’e mós, Koordenadór Rezidente ONU, Roy Trivedy, nota katak nasaun tomak iha mundu inklui Timor-Leste atu rekupera hosi pandemia ne’ebé fó impaktu maka’as ba grupu vulnerável no marjinalizadu liu, tanba ne’e importante atu harii futuru ne’ebé inkluzivu hanesan prevee ona iha ajenda ODS tinan 2030.

“Nasaun Unida liuhosi Fundu Konjunta ODS, hamutuk ho UE no parseiru dezenvolvimentu seluk, iha kompromisu atu apoia Governu Timor-Leste nia esforsu finansia no implementa Planu Estratéjiku Dezenvolvimentu (PED) no aselera progresu ODS ne’ebé alkansa ona,” nia subliña.

Implementasaun INFF, país lidera buka garante finansiamentu efetivu

Iha biban hanesan, Embaixadór UE ba Timor-Leste, Andrew Jacobs, konsidera INFF hanesan prosesu ne’ebé país maka lidera no buka atu garante finansiamentu efetivu no aplikasaun estratejia dezenvolvimentu, hamutuk ho planu, ambiente no ambisaun ba ekonomia matak no sirkulár ida.

“Iha Timor-Leste sei ajuda garante finansiamentu no implementasaun di’ak liuhosi estratejia Rekuperasaun Ekonómika pós COVID 19, ne’ebé sei orienta apoiu hosi UE ba país ne’e iha futuru,” nia dehan.

Objetivu jerál INFF iha Timor-Leste mak atu identifika no insentiva finansiamentu adisionál ba ODS, liuhosi aumenta espasu fiskál hodi aumenta investimentu hosi setór públiku no privadu nasionál no internasionál, inklui halo planeamentu no orsamentu ne’ebé substansiál liután tuir ODS no PED.

Kuadru ne’e sei ajuda hadi’a governasaun no koordenasaun, artikula estratejia finansiamentu ida no hametin kuadru monitorizasaun no fiskalizasaun.

“Parte interesada hosi setór privadu hanesan Kámara Komérsiu no Indústria Timor-Leste (CCI-TL), instituisaun finanseira sira inklui Banku Sentrál Timor-Leste (BCTL, sigla portugés) parseiru dezenvolvimentu sira, Organizasaun Naun Governamentál (ONG), Organizasaun Sosiedade Sivíl, grupu komunitáriu sira no Governu lokál sira sei involve iha prosesu INFF”,” Embaixadór UE hatutan.

Hetan asisténsia instrumentu finansia ODS nível nasionál

INFF Timor-Leste hetan apoiu hosi sistema ONU, UE, no parseiru, hanesan instrumentu planeamentu no implementasaun ida atu finansia ODS iha nível nasionál.

Kuadru ne’e sei analiza fonte finansiamentu tomak no meiu implementasaun la’ós finanseira ne’ebé mak disponível.

Nune’e mós, dezeña estratejia finansiamentu atu mobiliza no hasa’e rekursu adisionál, jere risku, no alkanse prioridade dezenvolvimentu nasionál ne’ebé mak define ona iha PEDN no ODS.

Aleinde ne’e, INFF sei aliña no kontribui ba Goveru nia programa Reforma Jestaun Finansa Públiku, ne’ebé mak daudaun ne’e la’o hela no fornese apoiu reál ba iha implementasaun Planu Rekuperasaun Ekonómika COVID-19 no estratejia setorál.

Governu mós bele uza INFF atu delibera no prepara ba futuru Timor-Leste pós-Petróleu.

Plataforma ne’e sei permite iha kuadru finanseira forte ho investimentu estratéjiku, inklui impostu pró-saúde, finansiamentu diáspora, no finansiamentu klima, ne’ebé hanesan mákina hasa’e investimentu dezenvolvementu sustentável.

Área finansiamentu tolu ne’e identifika ona atu kataliza investimentu estratéjiku iha Timor-Leste.

Tulun nasaun reforsa prosesu planeamentu

Kuadru finansiamentu ne’e tulun nasaun sira hodi reforsa prosesu planeamentu no rezolve impedimentu ne’ebé iha atu finansia dezenvolvimentu sustentável no ODS iha nível nasionál.

Define mós fontes finansiamentu nasionál no internasionál ba finansiamentu públiku no privadu, ne’ebé permite nasaun atu dezenvolve estratejia atu aumenta investimentu, jere risku no atinje prioridade dezenvolvimentu sustentável, tuir buat ne’ebé identifika ona iha estratejia dezenvolvimentu sustentável nasional ida.

Governu Timor-Leste, ho apoiu hosi Programa Nasaun Unida ba Dezenvolvimentu (PNUD) no UE, hala’o ona Avaliasaun Finansas ba Dezenvolvimentu (DFA) iha tinan 2018.

Durante Asembleia Jerál ONU iha tinan 2019, Timor-Leste hatudu ninia kompromisu atu sai nasaun pioneiru 15 ne’ebé harii no implementa INFF.

Kompromisu ne’e hodi hatán ba nesesidade krítiku atu esplora meiu foun no inovadór, atu mobiliza rekursu adisionál ba dezenvolvimentu sustentável no haree filafali oinsá rekursu sira ne’ebé oras ne’e iha no utiliza hela atu atinje aspirasaun husi dezenvolvimentu país nian.

Hafoin lansamentu, kontinua ho workshop INFF via online ho aprezentasaun téknika hosi Sekretariadu foun INFF,  World Health Organization (WHO), International Organization for Migration (IOM) no Sekretaria Estadu Ambiente (SEA).

Eventu ne ‘e hetan partisipasaun hosi reprezentante hosi liña ministeriál relevante, Banku Sentrál Timor-Leste (BCTL, sigla portugés), Ajénsia ONU sira, parseiru dezenvolvimentu, setór privadu, sosiedade sivíl no jestaun relevante hosi MF.

Iha tinan 2015, iha konferénsia internasionál datoluk ONU kona-ba finansiamentu ba dezenvolvimentu, dirijente mundiál sira hala’o sorumutuk iha Adis Ababa, Etiópia, hodi konkorda kona-ba kuadru globál foun ida atu finansia ajenda ODS tinan 2030 no ODS 17.

Ajenda Adis Abeba, trasa rekomendasaun polítika prinsipál ba mobilizasaun no aliña rekursu ho objetivu globál sira no hatán ba dezafiu ne’ebé nasaun sei iha hela dezenvolvimentu nia laran bele iha finansiamentu ba ninia dezenvolvimentu sustentável.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here