Izolamentu Tasi-tolu. Imajen Tatoli/Maria Auxiliadora.

DILI, 30 marsu 2021 (TATOLI)—Oras ne’e daudaun pasiente ne’ebé hala’o hela tratamentu iha sala izolamentu Tasi-tolu, hamutuk na’in 241.

Pasiente 241 ne’e fahe ba grupu tolu kompostu hosi grupu A na’in 47,  grupu B na’in  54 no grupu C  na’in  140.

Notísia relevante:COVID-19: pozitivu 51, ativu 382

“Pasiente hirak-ne’e ho kazu lizeiru no ita halo tratamentu tuir sira-nia síntoma ne’ebé mak iha, hanesan isin manas, mear no seluk tan,” Koordenadór Pilár hitu no Jestaun Kazu COVID-19, Ministériu Saúde (MS), Nilton da Silva hateten ba jornalista-sira iha izolamentu Tasi-tolu, tersa-ne’e.

Médiku ne’e klarifika katak, pasiente-sira ne’e balun mai ho família no balun mai ho labarik kiik, entaun númeru ne’e boot  no ohin balun rekoperadu  ona.

Oras ne’e daudaun, pesoál saúde ne’ebé halo asisténsia iha izolamentu Tasi-tolu iha médiku ida no enfermeiru na’in-lima.

Kona-bá izolamentu Tibar, doutór Nilton hateten, iha pasiente hamutuk na’in 37 ho pesoál saúde kompostu hosi médiku ida no enfermeiru na’in-rua.

Governu mós iha ona alternativu hodi uza otél Novo Horizonte atu transforma ba izolamentu ne’ebé iha kuartu 90-resin, atu bele akumula pasiente ne’ebé kontinua aumenta hosi loron ba loron.

SS-CIGC, ohin rejista kazu pozitivu foun COVID-19 na’in 51, ne’ebé detetadu iha munisípiu Dili hamutuk 50,  Munisípiu Viqueque na’in-ida, iha pasiente  rekoperadu na’in 11 no númeru pasiente atuál 382.

Pasiente hirak ne’e SS-CIGC koloka iha sala izolamentu Vera Crus, Tibar, Tasi-tolu no otel Novo Horizonte.

Notísia relevante:COVID-19: sasin hosi pasiente rekoperadu

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here