Família matebian simu mate-isin iha Aeroportu Comoro, tersa (30/03). Imajen TATOLI/António Gonçalves

DILI, 30 marsu 2021 (TATOLI)—Aviaun Citilink ho destinasaun Kuala Lumpur-Dili tula pasajeiru 162 inklui mate-isin ida, to’o iha Aeroportu Internasionál Prezidente Nicolau Lobato, Comoro, tuku 13:00.

Matebian naran Domingos Maia Barreto ho idade 30, hosi suku Aiasa, munisípiu Bobonaro, ne’ebé mate iha fulan-fevereiru liubá tanba moras no foin serbisu tinan kotuk iha sidade Southampton, Inglaterra.

Família matebian simu mate isin iha aeroportu no triste liután tanba matebian nia kaben (DP) labele partisipa iha seremónia funerál tanba pozitivu COVID-19 no daudaun iha sala izolamentu.

Família matebian simu mate-isin iha Aeroportu Comoro, tersa (30/03). Imajen TATOLI/António Gonçalves

“Triste boot tanba matebian nia ferik-oan hadeer no reza ba matebian bainhira mate-isin iha hela Inglaterra, to’o nia ran menus no molok atu simu mate-isin iha aeroportu hodi akompaña to’o Bobonaro, horiseik halo teste swab no ohin hatudu rezultadu pozitivu,” Reprezentante família matebian, Ezaquel de Jesus, dehan ba Agência TATOLI, iha Aeroportu Comoro, tersa ne’e.

Notísia relevante: Pasajeiru 162 inklui mate-isin ida to’o iha Aeroportu Comoro

Tuir Ezaquel, família mós preokupa ho matebian nia oan na’in-tolu tanba sira-nia inan iha izolamentu.

Tanba ne’e, reprezentante família husu parte relevante fó tempu DP atu asiste funerál matebian.

“Karik bele fó tempu ba matebian nia feen bele asiste haloot nia katuas-oan maka filafali kumpre izolamentu, maibé sira dehan ladi’ak. Ida-ne’e mak ami-nia preokupasaun,” nia akresenta.

Mate-isin tula ba karreta funeráriu no lori ba rezidénsia Loro mata, tersa (30/03). Imajen TATOLI/António Gonçalves

Iha fatin hanesan, Reprezentante Ajénsia Viajen Cammer pc, unip, Rui Pires, hateten prosesu atu transporta mate-isin mai Timór durante fulan-ida nia laran, ne’ebé ajénsia viajen nafatin esforsu komunika ho autoridade iha Inglaterra.

“Ami hetan kooperasaun di’ak, tanba ne’e ohin mate-isin bele fila mai Timór,” nia dehan.

Tuir Rui Pires, matebian nia maluk iha Inglaterra halibur hamutuk osan $42.000 ba matebian nia família.

“Ha’u orgaullu tebes nu’udar timor-oan, unidade tebes iha ema-nia rai ne’ebé hatudu  ezemplu  di’ak ida tamba ita la’o rai, maibé kuandu  ita hetan susar sempre buka malu hodi hambrik hamutuk,” nia akresenta.

Bainhira aviaun to’o iha aeroportu, mate-isin tula iha karreta funeráriu no lori ba rezidénsia iha Loro mata, hafoin sei haloot iha ninia moris fatin, Bobonaro.

DP ho karreta ambulánsia, ne’ebé hetan mós akompañamentu hosi ekipa saúde, simu mate-isin iha aeroportu.

Matebian nia kaben hakarak akompaña funerál iha Bobonaro, maibé pesoál saúde no seguransa konsola didi’ak hodi nia la partisipa no fila ba fatin izolamentu, tanba nu’udar pasiente pozitivu COVID-19 bele fó risku ba ema seluk.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here