Arsebispu Arkidioseze Metropolitana Dili, Don Virgílio do Carmo da Silva, SDB. Imajen/Tatoli.

DILI, 30 marsu 2021 (TATOLI)—Arsebispu Arkidioseze Metropolitana Dili, Don Virgílio do Carmo da Silva, hateten daudaun ne’e iha situasaun serka santária nia laran ne’e husu nafatin ba sarani sira atu akompaña situasaun polítika rai-laran ho maturidade molok foti desizaun.

“Uluk nanain iha situasaun ida-ne’e konvida ita sarani, aumezmu tempu povu Timor atu haree ho maturidade ida, la’os hodi emosaun mak hasoru realidade polítika ida-ne’e. Tanba ne’e, ba sarani sira atu akompaña situasaun polítiku iha rai laran ne’e ho ita-nia maturidade katak koko atu komprende akompaña didi’ak nune’e ita bele komprende molok foti desizaun no reaasaun sira liuliu liga ho establidade,” Don Vigílio do Carmo da Silva hateten ba jornalista sira hafoin hato’o mensajen paskua nian iha Câmara Eclasiástica, Lecidere, Dili, tersa ne’e.

Don Virgílio hateten, iha situasaun ne’e liga ho pendémia COVID-19 no liga ba espíritu paskua ninian, ida-ne’e mós konvida ema hotu-hotu atu haree iha situasaun hirak ne’e hotu oinsá buka buat ne’ebé loloos.

“Iha tempu paskua ninian ne’e, lia-loos mak importante tanba ita uza ita-nia maturidade akompaña situasaun sira-ne’e ho naroman paskua nian. Bele lori duni esperansa katak atu tau ikus ba ida-ne’e, ema bele hatene naroman no nakukun hotu hosi situasaun polítika sira-ne’e,” nia dehan.

Iha situasaun ne’e, nia dehan, sei kria tensaun entre ema maibé la’ós ho tensaun bele rezolve maibé nu’udár sarani liafuan sira-ne’ebé la kona malu ne’e koko nafatin moris iha ambiente ida-ne’ebé dame no domin nia laran.

“Iha espíritu ida-ne’e ninian, husu ba sarani sira hotu, ita mós tenke reza akompaña nafatin iha tempu kuarezma no semana santa ida-ne’e. Ita reza, nune’e buat hotu loke liután ita-nia polítiku-na’in sira-nia neon no laran atu hatene to’o rohan povu hotu bele hetan naroman ida, tanba naroman mak halo ema hotu sai hakmatek,” nia hateten.

Tanba ne’e, Don Virgílio husu ba sarani sira liuliu iha tempu paskua no semana santa ida-ne’e, ajuda malu ho orasaun la’ós ba hakamatek COVID-19 ninian de’it maibé mós ba situasaun polítiku iha rai-laran nia hakmatek.

Iha serka sanitaria nia laran ne’e, Don Virgílio husu Governu atu oinsá moras COVID-19 ne’e labele da’et no lahamate ema maibé Governu mós tenke kria mekanizmu ruma oinsá povu labele mate ba hamlaha.

 “Ha’u hanoin ida-ne’e ezersísiu ida-ne’ebé ita-nia nai-ulun sira tenke fera ulun duni atu bele kria situasaun hakmatek. Tanba, fatór ida ne’ebé kontribui ba ita-nia desobidiénsia ida mak kabun ne’e. Tanba bainhira kabun hamlaha ne’e bele obriga ema halo buat ne’ebé sira hakarak,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here