Arsebispu ba Arkidioseze Metropolitana Dili, Virgílio do Carmo da Silva. Imajen TATOLI/Egas Cristóvão

DILI, 30 marsu 2021 (TATOLI)—Arsebispu Arkidioseze Metropolitana Dili, Don Virgílio do Carmo da Silva, hateten iha pandemia COVID-19 ne’e Jesus Kristu nia moris hias sai hanesan naroman foun ida iha nakukun kalan nian ne’ebé halo mundu tomak hakdasak ho COVID-19, maibé Jesus Kristu mós sai hanesan esperansa moris hias nian ba ema hotu.

“COVID-19 obriga ita hotu atu hela iha ida-idak nia fatin, halo ita la livre. Iha nakukun ida-ne’e mak hosi uma kreda hakarak fó sai ba ema hotu ho lian ida de’it makaas no nakonu ho ksolok, katak Kristu mak ha’u-nia esperansa moris hias. Mensajen ida-ne’e, la’ós hanesan COVID-19 nian maibé nia trasmite hosi fuan ba fuan. Basá ema barak nia fuan hein hela novidade ida-ne’e, tanba novidade ida-ne’e esperansa nian,” Don Virgílio do Carmo da Silva hateten ba jornalista sira, liuhosi konferénsia imprensa hodi hato’o mensajen paskua nian ba sarani sira, iha Câmara Eclesiástica, Lecidere, Dili, tersa ne’e.

Don Virgílio hatutan, ida-ne’e la ko’alia kona-ba formula májia ida-nian ne’ebé mai halakon ema-nia problema sira automatikamente maibé ida-ne’e vitória ida domin nian kona-ba buat aat hotu nia abut, la’ós vitória ida-ne’ebé hasees-aan hosi ema-nia sofrimentu no mate.

“Liuhosi ita-nia terus, Jesus Kristu loke dalan iha nakukun laran transforma buat aat ba di’ak,” nia hateten.

Bispu ne’e hatutan, Jesus Kristu ne’ebé moris hias, Nia mak ida-ne’ebé ema hedi Nia iha kruz, la’ós lori ema seluk nia isin ne’ebé nabilan no kanek sira-ne’ebé transforma ba esperansa.

“Mai ita hateke ba Nia atu Nia bele kura ita ema-nia kanek sira. Tanba, momentu ida ne’e, atu ita hanoin ita-nia maluk sira-ne’ebé iha izolamentu, kuarentena, no sira-nia família hotu ne’ebé iha paskua ne’e labele halibur hamutuk. Maromak nia hun mak haraik no konsola sira no ita hotu ne’ebé iha hela prova ida-ne’e,” Don Virgílo esplika.

Iha semana santa ida-ne’e, Don Virgílio fó hanoin ba sarani sira atu hanoin mós pesoál sira-ne’ebé la sura kolen servisu loron-kalan atu atende ba maluk hirak ne’ebé hetan kazu pozitivu COVID-19 atu labele da’et ba ema seluk.

“Hanoin mós ba ita-nia pesoál saúde, membru Falintil-Fors Defeza Timor-Leste (F-FDTL) no membru Polísia Nasionál Timor-Leste (PNTL) sira-ne’ebé loron-kalan servisu makaas atu hamatan ba ema moras COVID-19 no garante nafatin órden no seguransa mai ita hotu, atu ema hotu kumpre didi’ak protokolu COVID-19 nian,” nia dehan.

Amu-lulik salesiano ne’e hatutan, paskua hanesan momentu ida solidaun ne’ebé obriga ema hotu tenke iha uma no la sente furak tanba pandémia COVID-19 mak obriga Pandemia ida-ne’e, tuir nia, la limita ema atu espresa domin ba malu maibé mós posibilidade atu rekore ba konsolasaun ispirituál ne’ebé maihosi sakramentu sira liuliu eukaristia no konfesa.

Don Virgílio hateten, maske iha tinan ida-ne’e iha Dioseze Dili seidauk bele selebra paskua tanba serka sanitaria maibé iha munisípiu lubuk ida mak sarani sira sei selebra paskua, katak ema hotu sei hamutuk nafatin iha orasaun.

“Ita konfia katak Maromak tau matan nafatin mai ita hotu. Ho Maromak nia tulun, buat hotu sei liu. Laran metin nafatin ba Maromak. Liuhosi paskua haraik mos ha’u-nia esperansa ba ita-nia médiku, enfermeiru, ne’ebé kontinua fó sasin domin Kristu ninian ba ita-nia maluk hotu ne’ebé presiza. Nune’e mós ba ita-nia maluk hotu ne’ebé servisu makaas atu garante servisu ne’ebé esensiál ba ita-nia maluk sira-ne’ebé afetadu,” Don Virgílio hateten.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here