Bee-moos. Imajen/Espesiál

DILI, 29 marsu 2021 (TATOLI)—Administradór Postu Administrativu Iliomar, João Baptista Ruas, infroma hahú hosi Timor-Leste restaura nia indepedénsia iha 2002 to’o ohin loron, uma-kain 608 iha Postu Administrativu Iliomar seidauk asesu bee-moos.

Administradór Postu Administrativu Iliomar, João Baptista Ruas. Imajen/Espesiál.

“Postu Administrativu Iliomar iha totál populasaun hamutuk 10.443. Hosi total populasauan ne’e, populasaun hamutuk 7.270 mak asesu ona bee-moos no populasaun sira-ne’ebé seidauk asesu bee-moos ne’e iha uma-kain 608 ho totál populasaun hamutuk 3.175,” João Baptista Ruas, informa ba Agência TATOLI, liuhosi telefónika, segunda ne’e.

Nia hatutan, uma-kain sira-ne’ebé seidauk asesu ba bee-moos ne’e la’ós hosi suku ida ka rua de’it maibé hosi aldeia 25 iha suku neen (6) ne’ebé pertense ba Postu Administrativu Iliomar ne’e seidauk asesu bee-moos.

Preokupasaun kona-ba bee-moos ne’e, nia dehan, la’ós foin iha nia mandatu mak hato’o proposta ba munisípiu ka nasionál, maibé hahú hosi administradór sesante sira-nia tempu kedas maibé to’o agora seidauk hetan rezultadu.

“Kona-ba bee-moos ne’e la’ós iha ha’u-nia tempu mak foin sai hanesan preokupasaun ida maibé iha tempu uluk kedas. Tanba, tempu bailoron naruk, ami araska tebes ba bee-moos. Proposta sira-ne’e, ami hatama dala barak ona maibé to’o agora seidauk iha rezultadu,” nia dehan.

Iha tempu bailoron naruk, nia haktuir, abitante sira tenke la’o ain to’o kilomentu rua ka tolu mak foin bele hetan bee-moos hodi kuru iha bee-matan anba bee-matan sira ne’ebé besik suku sira-ne’e maran hotu.

“Ha’u husu ba ministériu relevante atu haree mós ba ami-nia preokupasaun sira-ne’e. Tanba, komunidade iha área rurál presiza mak infraestrutura bázika hanesan, bee-moos, eletrisidade no estrada. Maibé, realidade ita-nia komunidade barak mak sei enfrenta ba problema hanesan halerok ba bee-moos no seluk tan,” João Ruas hateten. 

Entretantu, Fasiliatadór Servisu Água Saneamentu (SAS) Postu Administrativu Iliomar, Constantino da Costa, preokupasaun kona-ba bee-moos nian ne’e, tinan 2014 nia parte halo ona planu hatama ona ba munisípiu maibé to’o agora seidauk iha resposta.

“Proposta no planu prioridade sira-ne’e ami hatama ba munisípiu iha 2014 maibé tanba ho razaun orsamentu limitadu labele finansia, entaun to’o agora komunidade iha Postu Administrativu Iliomar balun seidauk asesu bee-moos ne’e. Espera katak, tinan ne’e, Governu bele responde komunidade iha área rurál sira-nia preokupasaun, tanba bee-moos ne’e impotante ba ema-nia moris,” nia dehan.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here