DILI, 29 marsu 2021 (TATOLI)-–Ministériu Obra Públiku (MOP) liuhosi Diresaun Nasionál Estrada, Ponte no Kontrolu Cheia (DNEPCC, sigla portugés) akompaña aprezentasaun ezbosu dezeñu detalladu finál hosi konsultór Detile ne’ebé konsórsiu ho PDP UTEC hosi Indonézia, ba konstrusaun estrada urbana munisípiu Maliana ho distánsia kilómetru 23, molok Komisaun Nasionál Aprovizionamentu (CNA, sigla Portugés) loke konkursu públiku iha tinan ne’e.
Diretór Nasionál Estrada, Ponte no Kontrolu Cheia, João Mario Gama de Sousa, informa tékniku DNEPCC fó ona atensaun ba konsultór iha parte balun atu halo detallu hafoin submete ba MOP.
“Ita-nia konsultór submete dokumentu finál estudu iha fulan-abríl. Ami haruka ba ADN hodi verifika ne’ebé presiza mos tempu, hafoin haruka fali ba CNA hodi loke konkursu públiku iha maiu 2021 no konstrusaun só bele hahú iha outubru ou novembru tamba prosesu fulan lima to’o neen,” Diretór Nasionál afirma ba Agência TATOLI, via telefónika, segunda ne’e.
Kona-ba dezeñu ne’e, DNEPCC husu ba konsultór atu fó atensaun ba drenajen, liuliu kaixa vizita, atu bele simu udan been no futuru instalasaun bee kanu ba komunidade nia rezidénsia (sanemantu báziku), instalasaun fiu telekomunikasaun, disponibilidade materiál konstrusaun ne’ebé atu tau ba dezeñu arkiteturál hanesan ba paseiu, no asesibilidade ba ema ho defisiente.
“Presiza tau iha espesifikasaun konstrusaun hodi iha prosesu konstrusaun, konstrutór bele halo tuir no rejistu afetadu sira hosi alargamentu estrada urbana ne’ebé presiza tau ona kuantidade detalladu hodi Governu bele kompesa molok halo konstrusaun,” nia hatutan.
Orsamentu ba reabilitasaun estrada ne’e prevee ona iha Orsamentu Jerál Estadu (OJE) 2021 iha pakote fiskál MOP.
“Ami seidauk bele fó sai montante tanba ADN seidauk verifika, ida-ne’e bele fó sai hosi CNA kuandu loke konkursu públiku,” nia katak.
Konkursu públiku sei loke no utiliza verba Fundu Infraestrutura, tanba ne’e DNEPCC sujere konsultór atu dezeña konstrusaun ba faze haat ho orsamentu ketak, tanba bainhira tau hamutuk nia kustu sei boot.
“Faze haat ne’e, konsultór fahe ba faze ne’ebé tuir sira-nia analiza, ba importante uluk no ida ne’ebé mak ladún importante, nune’e bainhira orsamentu la to’o, ita iha trosu ida ne’ebé mak halo uluk ona ho orsamentu tuir kapasidade Governu,” nia hatutan.
Tuir Dirijente ne’e, iha estudu detalladu, konsultór mensiona kona-ba abitante afetadu ninia sasán hanesan uma, ai-horis, rai no seluk tan atu halo kompesasaun molok halo konstrusaun.
Jornalista: Florêncio Miranda Ximenes
Editora: Julia Chatarina
