Diretór Luta Hamutuk, José Alves da Costa, Imajen/Egas Cristovão.

DILI, 29 marsu 2021 (TATOLI)—Organizasaun Naun Governamentál Luta Hamutuk konkorda ho Governu nia planu atu estende Estadu Emerjénsia (EEP) ba dala-12, tanba númeru kazu pozitivu COVID-19 iha Timor-Leste ne’e kada loron aumenta ba beibeik.

Notísia Relevante: PR husu PN atu renova Estadu Emerjénsia

“Ha’u hanoin merese atu estende Estadu Eemerjénsia tanba ita-nia númeru kazu COVID-19 kuaze aumenta loron ba loron. Maske ita seidauk rejista ema mate maibé númeru kazu COVID-19 aumenta ne’e sai indikadór ida, atu ita presiza estende Estadu Emerjénsia ba dala-12,” Deiretór Ezekutivu Luta Hamutuk, José Alves da Costa, hateten ba jornalista sira liuhosi telefónika, segunda ne’e.

José Alves da Costa fó sujestaun ba Governu atu labele deside estensaun ba Estadu Emerjénsia ne’e kada fulan de’it maibé halo estensaun ho tempu naruk, tanba kazu pozítvu COVID-19 aumenta ba beibeik.

“Ha’u fó sujestaun katak Governu ho Estadu labele deside estende Estadu Emerjénsia (EE) ba semana rohan de’it ka fulan ida de’it maibé tenke haree ba tempu naruk nian. Tanba, ha’u la fiar katak fulan ida mai atu la aumenta kazu númeru pozitivu COVID-19 ne’e, lae,” nia hateten.

Tanba, nia dehan, moras COVID-19 ne’e kada loron aumenta ba beibeik no aimoruk atu kura moras laiha, entaun tenke Governu tenke halo rigór tan medida prevensaun ba Estadu Eemerjénsia ne’e (EE).

Nia husu ba parte saúde atu halo teste swab ba iha kada bairru ka aldeia, atu hatene ema ida-ne’ebé mak pozitivu lori ba izolamentu no hirak ne’ebé negativu ne’e haruka hakmatek iha ida-idak nia uma.

“Bainhira rigór iha prevensaun Estadu Emerjénsia, Estadu no Governu tenke iha planu atu tau responsabilidade ba populasaun nia nesesidade bázika loro-loron nian liuhosi fó subsídiu ba komunidade,” nia dehan.

Daudaun ne’e, iha loron 28 fulan marsu tian 2021, Timor-Leste rejista ona kazu pozitivu COVID-19 hamutuk na’in-322, no hahú marsu 2020 to’o 28 marsu ne’e iha ema na’in-491 mak hetan infesaun hosi SARs-CoV-2 no seidauk rejista ema mate.

Tuir dadus hosi Organizasaun Mundiál Saúde (OMS), kona-ba infesaun SARs-Cov-2 iha Nusa Tenggara Timur (NTT), iha 23 marsu 2021, kazu konfirmadu hamutuk 12.012 no hamate ema na’n-327, no mundialmente rejista kazu konfirmadu hamutuk 123.216,178 no hamate ema hamutuk 2.714,517 tanba COVID-19.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here