Xefe Departamentu Jestaun Merkadoria Guarda Munisípiu Dili, Berta Santa Gonçalves Vieira. Imajen Tatoli/Egas Cristovão.

DILI, 29 marsu 2021 (TATOLI)—Xefe Departamentu Jestaun Merkadu Guarda Munisípiu Dili, Berta Santa Gonçalves Vieira, hateten kazu pozitivu COVID-19 iha Munisípiu Dili aumenta makaas, entaun husu ba vendedór sira atu nafatin uza konsiénsia hodi kumpre protokolu saúde nian, hanesan evita labele halibur malu iha merkadu laran.

Notísia Relevante: COVID-19, Ekipa Jestaun Merkadória Kontinua Halo Kontrolu ba Merkadu iha Dili

“Ha’u husu ba vendedór sira hosi Merkadu Manleuana no Taibesi uza nafatin konsiénsia evita halibur malu iha merkadu laran. Liuliu, hanesan joga karta ka ‘bingo’ tanba daudaun ne’e Munisípiu Dili rejistu kazu pozitivu COVID-19 númeru sa’e makaas,” Berta Santa Gonçalves Vieira hateten ba Agência TATOLI, liuhosi telefónika, segunda ne’e.

Atu redús moras COVID-19, Berta Santa Gonçalves Vieira hateten, vendedór sira tenke kumpre nafatin regra hosi Organizasaun Mundiál saúde (OMS) ne’ebé Ministériu saúde (MS) fó sai hanesan tenke fase liman beibeik ho sabaun, uza máskara no liuliu distánsia sosiál hosi ema ida ba ema seluk tenke metru ida ka metru ida ho balun.

Tuir nia, iha vendedór ruma ne’ebé kontinua kontra regra prevensaun COVID-19 nian hodi joga karta ka halimar “bingo” iha merkadu laran, mak Jestaun Merkadu sei fó hanoin ba koordenadór merkadu atu foti medida ruma.

“Ba ha’u pesoál seidauk haree ho matan vendedór sira joga iha karta ka bingo iha merkadu laran, bainhra ha’u sai ba halo survei. Maibé, karik iha, ha’u sei ko’alia ho koordenadór Merkadu nian atu foti medida ruma ba vendedór sira-ne’ebé joga karta iha merkadu laran. Tanba merkadu la’os fatin atu joga kart aka halimar ‘bingo’, maibé merkadu nu’udár fatin ida atu faan sasán sira,” nia dehan.

Durante iha serka sanitaria no konfinamentu domisiliária ne’e, nia hateten, ekipa Jestaun Merkadu nafatin halo kontrolu ba merkadu sira iha Dili laran, hodi haree ba merkadu kiik no boot sira inklui fatin balu ne’ebé kontinua faan sasán arbiru.

“Durante serka sanitária, Jestaun Merkdu nia kontinua la’o nafatin tanba bazea ba Dekretu-lei númeru 32/2008, kona-ba Prosedimentu Administrativa, entaun ita ezekuta nafatin, kontinua prevene nafatin sé mak faan iha estrada ibun hanesan trotoar leten,” Xefe Jestaun Mekadu ne’e hateten.

Iha serka sanitária ne’e, Jestaun Merkadu nafatin servisu hamutuk ho PNTL Munisípiu Dili hodi haruka muda sai kedas vendedór sira-ne’ebé kontinua faan iha fatin públiku.

“Ita haruka sira muda no sai, labele halo atividade faan iha estrada públiku ka trotoar leten,” nia dehan.

Nia argumenta, servisu ne’ebé sira halo la’os haree ba tempu serka sanitária de’it, maibé loro-loron sira hala’o tanba sira-nia servisu ne’e la haree ba serka sanitaria de’it maibé atu haree sidade Dili ne’e sai moos.

“Servisu ne’ebé ita halo la haree ba serka sanitária, tanba ita servisu ezekuta tuir lei. Ne’ebé, bainhira de’it serka sanitária ne’e ramata mós, servisu jestaun merkadu nian mantein la’o nafatin,” nia dehan.

Notísia Relevante: Serka sanitária, vendedór sira labele joga “bingo” iha merkadu laran

Jornalista: Arminda Fonseca 

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here