Lopotipu DNTT. Imajen/Espesiál

DILI, 29 marsu 2021 (TATOLI)–Diresaun Nasionál Transporte Terrestre (DNTT) liuhosi  Departementu Rejistu ba Veíkulu (DRV, sigla portugés), durante períodu serka sanitária no konfinamentu obrigatóriu jerál iha munisípiu Dili, konsege rekolla reseita $68.682,5 ba kofre Estadu.

Reseita hirak ne’e, DNTT rekolla liuhosi rejistu motór hamutuk 1.015 ne’ebé kada motór selu $54,50 ho totál orsamentu $55.317,5, karreta boot ne’ebé rejistu 12 selu $145 ho totál hamutuk $1.740 inklui karreta ho tipu kiik 122 ne’ebé pagamentu ba kada unidade $97,50 ho totál $11.895.

“Rendimentu ba rejistu veíkulu foun durante serka sanitária hahú loron 09 to’o 29 marsu 2021. Atendimentu ne’e hala’o de’it ba dealer no kompañia hirak ne’ebé hatama veíkulu tuir portu Dili,” refere nota ne’ebé Agência TATOLI asesu, segunda ne’e.

Governu deside estende serka sanitária no konfinamentu obrigatóriu iha munisípiu Dili to’o oras 23:59 loron 02 abríl 2021 liuhosi aprovasaun Projetu Rezolusaun Governu.

Rezolusaun Governu haktuir, durante períodu serka sanitária no konfinamentu obrigatóriu iha Dili, kontinua taka postu fronteira no bandu sirkulasaun ema hosi Dili ba munisípiu seluk, exetu iha kazu emerjénsia ho razaun seguransa, saúde públika, umanitária ka seluk ne’ebé nesesáriu ba interese públiku.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here