iklan

NASIONÁL, EKONOMIA, DILI, HEADLINE, POLÍTIKA

Assanami propoin fó subsídiu $100 kada ema ida iha serka sanitária

Assanami propoin fó subsídiu $100 kada ema ida iha serka sanitária

Deputadu Bankada PD, Mariano Assanami Sabino. Imajen Tatoli/Egas Cristóvão

DILI, 29 marsu 2021 (TATOLI)—Bankada Partidu Demokrátiku (PD) iha Parlamentu Nasionál husu Governu atu fó de’it subsídiu $100 ba kada ema ida, tanba aplikasaun Estadu Emerjénsia iha ámbitu serka sanitária no konfinamentu obrigatória ne’e, fó konsekuénsia ba ema hotu iha atividade ekonómika.

“Ha’u hanoin ramata casta bázika ne’e di’akliu ita fó apoiu ba kada ema ida $100, nune’e efetivu liu iha apoia umanitária ne’e. Tanba, ema hotu hetan konsekuénsia ekonómika iha serka sanitaria ne’e,” Deputadu Mariano Assanami Sabino, levanta liuhosi plenária, segunda ne’e.

Nia dehan, Sentru Lojísitika Nasionál (CLN-sigla portugés) bele sosa nafatin produtu lokál no fornese ai-haan tenke oferese hosi loja sira-ne’ebé besik iha komunidade nia leet, maibé di’akliu fó subsídiu $100 kada ema ida.

Eis Ministru Agrikultura no Peska ne’e hateten, apoia ba estudante sira-ne’e, diresaun kada estudante iha universidade ne’e iha, burokrasia ne’ebé durante ne’e naruk no dalaruma sira ense formulária ne’e la efetivu ida. Solusaun di’akliu, nia dehan, tenke identifika estudante sira-nia hela fatin no fó apoia direta ba sira-nia fatin.

Nune’e mós, nia husu Governu, ba oin di’akliu fó subsídiu $200 ba estudante sira hela iha kost kada ema ida no kada fulan livre hosi propinas, no se bele sira mantein iha idak-idak nia hela-fatin hodi estuda no aprende liuhosi online.

Aleinde ida-ne’e, nia mós husu Governu atu fó apoia ba populasaun sira-ne’ebé durante ne’e halo movimentasaun transporte públiku hanesan taxista sira, motorista mikrolete sira, sira-ne’ebé mak fa’an modo, fa’an obralan, tanba durante aplikasaun Estadu Emerjénsia sira labele book-aan.

“Ha’u hanoin ita troka ho sira-nia rendimentu ne’ebé lakon kada fulan $300, nune’e sira mantein nafatin iha idak-idak nia fatin, atubele kumpre nafatin protokolu COVID-19 nian,” nia dehan.

Deputadu PD ne’e husu Governu kontinua apoia liña-frente sira hanesan médiku, polísia, forsa, seguransa sivíl no ema hotu ne’ebé mantein servisu iha ámbitu Estadu Emerjénsia ne’e, atu nune’e sira hala’o kna’ar ho di’ak.

Nia husu Governu atu oferese bee-moos di’akliu ba komunidade iha vijénsia Estadu Emerjénsia ne’e, tanba bee-moos ne’e importantísimu iha prevensaun surtu COVID-19.

Jornalista: Evaristo Soares Martins

Editór: Cancio Ximenes

iklan
iklan

One Comment

Leave a Reply

iklan
error: Content is protected !!