SS-CIGC hala’o serimónia re-integrasaun ba pasiente rekoperadu na’in-lima hosi postu administrativu Fatumean. Imajen/SS-CIGC.

DILI, 28 marsu 2021 (TATOLI)—Sala Situação Centro Integrado Gestão de Crise (SS-CIGC), liu hosi Koordenadór Forsa-Tarefa ba Prevensaun no Mitigasaun COVID-19, Rui Maria de Araújo, agradese ba pasiente hotu-hotu ne’ebé  durante ne’e koopera di’ak tebes ho ekipa konjuta liña frente, liuliu ekipa profisionál saúde.

“Hodi SS-CIGC no ema hotu ne’ebé serbisu iha liña frente, agradese ema hotu ne’ebé detetadu pozitivu, hafoin kolabora di’ak-tebes ho ekipa konjunta saúde, aseita ba izolamentu iha fatin ne’ebé Estadu determina,” Rui Maria de Araújo agradese liu hosi konferénsia imprensa iha Centro Convenções Dili (CCD), domingu ne’e.

Notísia relevante:COVID-19: pozitivu foun 11, rekoperadu 13 no ativu 322

Rui Maria de Araújo konsidera kolaborasaun di’ak hosi pasiente-sira, hodi hase’es-an hosi ema ne’ebé seidauk hetan da’et virus ne’e, konsege prevene duni hodi la hada’et tan iha cluster-sira ne’ebé durante semana rua ikus ne’e la ativu ona.

Médiku ne’e mós aproveita hodi fó parabens ba sakrifísiu hosi sira ne’ebé rekoperadu ona no husu atu mantein kuidadu saúde iha komunidade nia leet.

Aproveita mós apela ba komunidade iha fatin ne’ebé maluk rekoperadu-sira hela bá, favór labele tauk, tanba sira ne’ebé sai hosi fatin izolamentu, ekipa saúde-sira sertifika ona katak, sira laiha ona risku atu hada’et-tutan virus ba ema seluk.

SS-CIGC hakarak mós informa ba públiku katak, sei nafatin iha ema ne’ebé, alénde la fiar, lakohi fiar, katak sira-nia rezultadu PCR pozitivu, insisti atu instituisaun Estadu-nian halo tuir sira-nia hakarak, no lakohi kolabora ho autoridade-sira atu ba iha fatin izolamentu ne’ebé Estadu determina.

“Ita respeita ema ida-idak nia direitu atu lakohi rekoñese, katak nia iha problema, maibé sidadaun-sira hotu mós iha devér atu proteje ema seluk nia saúde, no iha obrigasaun atu kolabora ho Estadu,” nia subliña.

Relatóriu hosi SS-CIGC  hatudu katak, to’o ohin, iha cluster 54 iha Munisipiu Dili, maibé ho baze evolusaun propagasaun virus iha cluster-sira ne’e, durante semana rua ikus, sura hosi 14 marsu 2021, ekipa konjunta saúde deside atu deklara katak iha cluster 11 (20%), mak la ativu ona iha transmisaun virus.

Ne’e tanba, iha semana rua-nia laran ona laiha kazu foun, no sira ne’ebé kontaktu-besik ho kazu pozitivu iha cluster hirak ne’e, sira-nia rezultadu teste PCR negativu dala rua.

Ohin, Sala Situação Centro Integrado Gestão de Crise (SS-CIGC) rejista kazu pozitivu foun COVID-19 na’in 11, ne’ebé detetadu hosi munisípiu Dili,  no númeru pasiente atuál 322.

Notísia relevante:COVID-19: JdSNB ba izolamentu ho transporte rasik

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here