Diretór Ezekutivu SERVE, Florêncio Sanches. Imajen TATOLI/António Gonçalves

DILI, 29 marsu 2021 (TATOLI)–Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, informa, durante implementasaun Estadu Emerjénsia no Serka Sanitária, simu pedidu empreza estranjeiru tolu hatama pedidu taka atividade ekonómika iha Timor-Leste.

“Agora daudaun ha’u simu hela pedidu kompañia tolu hosi Korea, Indonézia no Malázia,” Diretór Ezekutivu SERVE hateten ba Agência TATOLI, via telefónika, segunda ne’e.

Maski nune’e, Responsável ne’e dehan, nia parte labele mensiona kompañia nia naran tanba kestaun privasidade no regra, maibé prosesu nafatin la’o.

“Ita prosesa hela, bainhira sira kumpre regra atu taka kompañia, entaun ita prosesa fó sertifikadu enserra atividade. Agora prosesu prepara hela, maski serbisu daudaun aplika shift,” nia akresenta.

Enkuantu, dokumentu kompañia hosi Indonézia maka seidauk kompleta, tanba ne’e parte SERVE manda fali ba responsável kompañia atu kompleta.

Tuir Diretór SERVE, durante períodu Estadu Emerjénsia no Serka Sanitária, pedidu taka atividade barak liu empreza estranjeiru kompara ho empreza timor-oan.

“Agora ne’e maioria empreza estrajeiru sira maka taka barak aktividade ekonómika iha Timor-Leste, kompara ho empreza timor-oan sira tanba situasaun no sira susar selu eletrisidade no funsionáriu tanba rendimentu menus, tanba ne’e sira deside taka,” nia hatutan.

Iha tinan 2019, SERVE rejista empreza hamutuk 3.326, ho tipu kompañia hanesan Empresário em Nome Individual (ENIN) hamutuk 1.703, Sociedade Unipessoal por Quotas Limitada (Unipessoal, Lda) 1.129, Sociedade por Quotas Limitada (Lda) 475, Sociedade Anônima (S.A) 13, Representação Permanente (R.P) 6, no Empresa Pública 0.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here