Traballadór Timor-oan, João Rosário, hosi Munisípiu Bobonaro, Postu Administrativu Cailaco ne’ebé mout iha tasi iha Wando ne’ebé lokaliza iha Korea-do-súl. Imajen/Facebook.

DILI, 27 marsu 2021 (TATOLI)—Diretór Jerál Sekretariu Estadu Profisionál, Formasaun no Empregu (SEFOPE), Paul Alves, hateten SEFOPE seidauk simu relatóriu ofisiál hosi adidu SEFOPE nian iha Korea-do-súl kona-ba traballadór timor-oan ida ne’ebé deskonfia mout iha tasi Wando, Korea-do-súl.  

“Adidu traballadór SEFOPE nian iha Korea to’o ona iha fatin akontesimentu no seidauk hato’o relatóriu mai ha’u, ne’ebé ha’u seidauk brani atu fó sai informasaun loloos. Horisehik ha’u kontaktu ba adidu ne’e rasik mós, nia sei iha Sidade Wando ne’ebé mak dehan traballadór ida lakon ba ne’e. Loos duni, loron tolu ona, maibé informasaun loloos seidauk fó hatene mai, ne’ebé ita seidauk hatene loloos,” Paul Alves informa ba Agência Tatoli via telefónika, sábadu ne’e.

SEFOPE liuhosi ninia reprezentante iha Korea tun ona ba fatin akontesimentu hodi hatene loloos kronolojia hosi akontesimentu ne’e.

“Kuandu simu ona relatóriu ofisiál hosi adidu traballadór SEFOPE iha Korea-do-sul kona-ba kronolojia ba akontesimentu ne’e, ha’u sei fó sai ba mídia no públiku. Relatóriu loloos seidauk mai. Tanba, adidu ne’e mós seidauk fila hosi fatin akontesementu, ne’ebé ita seidauk hatene loloos alin ne’e lakon ka kauza hosi akontesimentu ne’e,” Paul Alves haktuir.

Tuir informasaun ne’ebé mak públika iha mídia sosiál katak traballadór timor-oan ne’e lakon durante loron tolu ona iha ninia servisu fatin. Traballadór ne’e naran João Rosário, hosi Munisípiu Bobonaro, Postu Administrativu Cailaco. Deskonfia lakon no mout iha tasi iha Wando ne’ebé lokaliza iha Korea-do-súl, iha Kinta (25/03/2021) tuku 12:00, ohin tama ona loron tolu maibé buka seidauk hetan.

Jornalista: Antónia Gusmão

Editór: Cancio Ximenes

HAKEREK NO HATÁN

Please enter your comment!
Please enter your name here