Primeiru-Ministru no Ministru Interiór, Taur Matan Ruak akompaña hosi Vise Ministru Interiór António Armindo no Komisáriu Faustino da Costa, hasai retratu hamutuk ho ofisiál superior PNTL, kinta (09/07/2020). Imajen/Eugénio Pereira.

DILI, 27 marsu 2021 (TATOLI)—Prezidente Parlamentu Nasionál (PPN), Deputadu Aniceto Longuinhos Guterres Lopes, husu instituisaun Polísia Nasionál Timor-Leste atu kontinua mantein ho dixiplina polisiál hodi garante lei no orden ba povu.

Iha momentu oportunu ida-ne’e, Prezidente Parlamentu Nasionál husu ba PNTL nu’údar instituisaun no nu’údar individu atu hanoin hikas papél importante garante lei no orden ne’ebé Estadu fó fiar.

Aniceto kongratula espesiál ba PNTL ne’ebé servisu hamutuk ho membru F-FDTL no pesoal saúde sira, durante períodu Estadu Emerjénsia to’o aplika medida serka sanitária.

Prezidente Parlamentu Nasionál, Aniceto Guterres. Imajen Tatoli /Egas Cristóvão.

“Imi hetan krítika maibé hetan mós suporta hosi públiku, sira-ne’e hotu lori imi ba hanoin hikas no hadi’ak imi-nia komportamentu no atitude hasoru ita-nia povu rasik. Hadi’ak, reforsa no mantein imi-nia disiplina polisiál, profisionalizmu no integridade nu’údar instituisaun Estadu nian hodi kontribui di’ak liután ba asegura lei no orden iha sosiedade tomák,” Prezidente Parlamentu Nasionál, Aniceto Longuinhos Guterres Lopes, hato’o mensajen liuhosi komunikadu imprensa relasiona ho aniversáriu PNTL ba dala-21 (27 marsu 2002-27 marsu 2021) ne’ebé Agência TATOLI asesu, sábadu ne’e.

Aniceto Guterres hateten, Polisia Nasional Timor-Leste nu’udar instituisaun Estadu nian ida-ne’ebé asegura implementasaun Lei no Orden iha Timor-Leste, tanba membru polísia sira Povu nia oan rasik ne’ebé Estadu adota, prepara, forma no atribui fasilidade hodi garante lei no orden ba povu tomak.

Nia akresenta, aniversáriu ba tinan ida-ne’e la hanesan ho tinan hirak liu ba ne’ebé labele selebra tanba situasaun lubuk ida bolu atensaun Estadu hodi husu imi-nia laran-kmaan no sakrifisiu atu asegura ho espesiál, orden no seguransa públika ba povu nia moris.

Nu’údar Prezidente Parlamentu Nasionál, lori Deputadu sira no povu tomák nia naran, hatoo parabéns ba Komandante PNTL, Komisáriu Faustino da Costa, ofisiál superiór sira to’o ajente sira hotu no agradese ba PNTL nia dedikasaun no sakrífisiu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here