Estudante medisina Timoroan na’in-12 iha Aeroporto Internacional José Martí Havana, Kapitál Cuva. Imajen/Espesiál.

DILI, 27 marsu 2021 (TATOLI)—Embaixadór Timor-Leste nian ba Cuba, Loro Horta, informa estudante medisina Timoroan hamutuk na’in-12, oras ne’e hala’o viajen hosi Havana-Cuba mai Timor-Leste.

Notísia Relevante: Bolseiru médiku espesialista Timoroan iha Cuba lamenta esklui viajen voo dala-rua

“Estudante medisina iha Cuba hamutuk 12 sai ona hosi Cuba iha 26 marsu (oráriu Cuba nian) fila ba Timor liuhosi Paris, Kuala Lumpur no ba liu Timor,” Embaixadór Loro Horta hato’o mensajen badak ba Agência TATOLI liuhosi WatsApp, sábadu ne’e.

Molok médiku espesialista na’in-12 ne’e sai hosi Havana, Embaixadór Loro Horta sei hasoru malu hafoin hala’o viajen hosi Havana, Doha, Kuala Lumpur no mai liu Dili.

Entretantu estudante medisina Timoroan ne’ebé oras ne’e hala’o hela estudu iha Cuba (lakohi temi naran), informa ba Agência TATOLI katak estudante na’in-12 ne’e transporta hosi aviaun Air France ho rute Paris, Doha, Kuala Lumpur no mai Dili.

Nia hatutan, loloos ne’e estudante na’in-15 mak fila maibé na’in-tolu (3) problema ho kondisaun saúde, entaun na’in-12 ne’e sai ona hosi Cuba, tuku 21.00 (oráriu Cuba nian).

“Agora daudaun sira tuir dalan Havana-Paris no hosi Paris-Doha-Kuala Lumpur, sei hela kalan rua iha Kuala Lumpur depois sei ba Dili, kolega sira hamutuk na’in-12. Posivelmente kolega médiku sira sei to’o iha Dili loron 30 marsu ho aviaun Citylink, maibé ha’u la inklui iha viajen tanba estudu seidauk ramata,” bolseiru ne’e informa.

Estudante medisina Timoroan na’in-12 iha Aeroporto Internacional José Martí Havana, Kapitál Cuva. Imajen/Espesiál.

Nia fó-sai katak, estudante medisina na’in-12 ne’e kompostu hosi espesialista iha área neurolojia na’in-ida (1), kardiolojia na’in-ida (1), endokrinolojia na’in-rua (2), radiolojia na’in-rua (2), nefrolojia na’in-rua (2) no terapia intensiva na’in-haat (4). Estudante na’in-12 hala’o estudu hahú hosi tinan 2018 no ramata iha fulan-dezembru 2020 liubá.

Nia haktuir, loloos ne’e bolseiru hamutuk na’in-29 maibé rua (2) fila tiha tanba moras, iha meadu 2019 na’in-rua (2) fila uluk tanba ramata estudu. Bolseiru na’in-rua (2) ne’e eskola iha área maestria farmasu (farmaco) vijilánsia.

Purtantu meadu 2020, na’in-rua (2) fila tuir tanba ramata ona estudu iha área bioestístika no 2021 ne’e na’in-12 fila mai Timor-Leste ne’ebé oras ne’e iha hela viajen.

Daudaun ne’e, bolsieru Timoroan na’in-11 mak sei hela iha Cuba tanba estudu seidauk ramata. Hosi na’in-11 ne’e, na’in-rua (2) sei hein diploma, na’in-tolu problema ho kondisaun saúde, na’in-tolu (3) sei ramata iha maiu 2021 no na’in-tolu (3) sei ramata estudu iha 2022.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here